لیسکو نے ایک اور بڑا سنگ میل عبور کر لیا: 132 کے وی زیرِ زمین کیبل سرکٹ بحال

لاہور (کرائمز پوائنٹ ڈاٹ کام ) چیف ایگزیکٹو لیسکو، انجینئر محمد رمضان بٹ کی قیادت میں لیسکو نے اللہ تعالیٰ کے فضل و کرم سے ایک اہم 132 کے وی زیرِ زمین کیبل سرکٹ کی کامیاب مرمت و بحالی مکمل کر لی ہے، جوکہ مئی 2022 سے غیرفعال تھا۔ ٹرانسمیشن لائن کا یہ اہم کا حصہ اب مکمل طور پر بحال کر دیا گیا ہے جس کی لاگت 22 ملین روپے ہے، جس سے لیسکو کے نیٹ ورک کی مضبوطی اور عملی صلاحیت میں نمایاں اضافہ ہوگا۔ اس سرکٹ کی بحالی کے نتیجے میں چند اہم 132 کے وی گرڈ اسٹیشنز کو بجلی کی فراہمی مزید بہتر اور مستحکم ہو گی جن میں موچی گیٹ، بادامی باغ، میکلوڈ روڈ، سنی ویو گرڈاسٹیشن شامل ہیں۔
اس کامیابی سے اندرون لاہور کے رہائشی علاقوں اور مرکزی لاہور کے تجارتی اداروں کو بجلی کی فراہمی میں نمایاں بہتری اور تسلسل حاصل ہوگا۔
یہ کامیابی وزیرِاعظم پاکستان کے وژن اور وفاقی وزیر توانائی کی خصوصی ہدایات کا عملی مظہر ہے، جس کے تحت توانائی کے شعبے میں جدیدیت اور کارکردگی میں تیزی لائی جا رہی ہے۔
چیف ایگزیکٹو لیسکو، انجینئر محمد رمضان بٹ نے اس موقع پر کہا کہ لیسکو اپنے ڈھانچے کو جدید خطوط پر استوار کرنے اور صارفین کو بغیر تعطل، معیاری بجلی کی فراہمی کے عزم پر قائم ہے۔