صفدرآباد کیڑا منڈی کی 25 سے 30 ہزار آبادی کا واحد راستہ تباہ

صفدرآباد (حافظ عثمان غنی)صفدرآباد کیڑا منڈی جہاں 25 سے 30 ہزار گھرانے مقیم ہیں بارش کے ایک ہی جھٹکے میں عملی طور پر کٹ کر رہ گئی۔ مقامی شہریوں کے مطابق ایک بااثر شخص نے “سیاست چمکانے” کی غرض سے آبادی کے واحد سولنگ روڈ کو اکھاڑ ڈالا، جس کے بعد آج ہونے والی شدید بارش نے علاقے کو تالاب بنا دیا: سڑک پر چار چار فٹ تک پانی کھڑا ہے اور کسی بھی قسم کی گاڑی، حتیٰ کہ ایمبولینس، کا گزرنا ناممکن ہو چکا ہے۔اہلِ محلہ کا کہنا ہے کہ یہ راستہ ہمارے بچوں کا اسکول ہو یا بیمار والدین کی ہسپتال تک رسائی، سب کا واحد سہارا تھا۔ اب چاروں طرف پانی ہی پانی ہے اور انتظامیہ نظر نہیں آ رہی۔”انتظامیہ کی خاموشی المیہ یہ ہے کہ اس سنگین صورتِ حال پر نہ اسسٹنٹ کمشنر صفدرآباد نے نوٹس لیا، نہ ڈپٹی کمشنر لاہور، اور نہ ہی کمشنر شیخوپورہ نے کوئی قدم اٹھایا۔ شہریوں کے مطابق بارش رکنے کے باوجود پانی کی نکاسی کے لیے کسی سرکاری مشینری یا اہلکار کا سایہ تک نظر نہیں آیا۔وزیراعلیٰ پنجاب سے فوری ایکشن کا مطالبہ کیڑا منڈی کے مکینوں نے وزیراعلیٰ پنجاب مریم نواز شریف سے اپیل کی ہے کہ وہ فوری طور پر صورتحال کا نوٹس لیں، ذمہ داران کے خلاف کارروائی کریں اور تباہ شدہ سولنگ کی ہنگامی بنیادوں پر بحالی یقینی بنائیں۔علاقہ مکینوں کا کہنا ہے کہ اگر بروقت اقدامات نہ ہوئے تو آنے والی ہر بارش اس انسانی بحران کو مزید گہرا کر دے گی۔