78ویں یومِ آزادی کے سلسلہ میں پرچم کشائی تقریب کا اہتمام

لاہور (آئی این پی)لاہور ہائیکورٹ میں 78ویں یومِ آزادی کے سلسلہ میں پرچم کشائی تقریب کا اہتمام کیا گیا۔ چیف جسٹس لاہور ہائیکورٹ جسٹس مس عالیہ نیلم نے عدالت عالیہ لاہور کی تاریخی عمارت پر پرچم لہرایا۔ لاہور ہائیکورٹ کے جسٹس عابد عزیز شیخ اور جسٹس سید شہباز علی رضوی بھی فاضل چیف جسٹس کے ہمراہ تھے۔ جبکہ لاہور کے جسٹس علی ضیا باجوہ سمیت دیگر فاضل جج صاحبان، لاہور ہائیکورٹ کے افسران و سٹاف اور انکی فیملیز نے پرچم کشائی تقریب میں شرکت کی۔ پرچم کشائی تقریب سے اظہارِ خیال کرتے ہوئے چیف جسٹس لاہور ہائیکورٹ جسٹس عالیہ نیلم نے کہا کہ ہمارے باعثِ مسرت ہے کہ ہم آج اپنا 78واں ہومِ آزادی منا رہے ہیں۔ ہمیں یہ آزادی قائداعظم محمد علی جناح کی شبانہ روز کوششوں سے میسر آئی۔ ہمیں آج کے دن عہد کرنا ہے کہ ہمیں قائد کے ویژن کے مطابق کام کرنا ہے۔ اگر ادارے قائد کے ویژن کے مطابق کام کریں گے تو ملک ترقی کرے گا۔ پنجاب کی عدلیہ میں لوگوں کو انصاف فراہم کرنے کے لئے ہر ممکن اقدامات کئے جارہے ہیں۔ انہوں نے کہا کہ زیرالتوا مقدمات کو نمٹانا ہمارے لئے بہت بڑا چیلنج ہے۔ زیرالتوا مقدمات کو نمٹانے اور صوبے کی عوام کو جلد و معیاری انصاف کی فراہمی کے لئے عدلیہ میں ہر ممکن اقدامات کئے جارہے ہیں۔ چیف جسٹس عالیہ نیلم نے مزید بتایا کہ صوبہ بھر میں ماڈل کورٹس بنانے کے احکامات جاری کردیئے گئے ہیں۔ ضلعی عدلیہ کے ساتھ ساتھ لاہور ہائیکورٹ میں بھی بنچز قائم کئے جارہے ہیں۔ سول و فوجداری کے ساتھ ساتھ کمرشل، ٹیکس و آئینی مقدمات کے لئے بھی مخصوص بنچز بنائے جائیں گے۔ فاضل چیف جسٹس نے عزم کا اظہار کیا کہ ہر ادارہ و شہری اپنی ذمہ داریاں پوری دیانتداری سے پوری کرے گا تو پاکستان ترقی کی منازل طے کرتا ہوا تاقیامت قائم و دائم رہے گا، انشااللہ۔ پرچم کشائی تقریب کے اختتام پر ملکی سلامتی و ترقی کے لئے دعا بھی کی گئی۔ قائم مقام رجسٹرار لاہور ہائیکورٹ چوھدری محمد انوارالحق نے تقریب کی نظامت کے فرائض سرانجام دیئے۔