لاہور منشیات سے پاک کرنے کے لئے سرگرم ِعمل ہے، بلال صدیق کمیانہ

لاہور (آئی این پی) سی سی پی او بلال صدیق کمیانہ کی زیر ِ نگرانی لاہور پولیس کی انسدادِ منشیات کارروائیاں جاری ہیں، اس ضمن میں ماہ جولائی میں اب تک منشیات فروشی میں ملوث526ملزمان کی گرفتاری عمل میںلاکر511مقدمات کااندراج کیا گیا ہے۔ترجمان لاہور پولیس نے بتایا کہ ماہ جولائی میں گرفتار ملزمان کے قبضہ سے198کلو چرس،68کلو آئس،25کلو ہیروئین،06کلو افیون اور2263لیٹرشراب برآمد کی گئی ہے۔اسی طرح رواں سال منشیات فروشوں کے خلاف مختلف کارروائیوں میں 6697 ملزمان کوگرفتار کر کے شہر کے مختلف تھانوں میں 6557مقدمات کا اندراج کیا گیا ہے۔امسال ملزمان کے قبضہ سے3439کلو چرس،554کلو آئس، 255کلو افیون،302 کلو ہیروئین اور41186لیٹر شراب برآمد کی گئی ہے۔سی سی پی او بلال صدیق کمیانہ نے کہا کہ لاہور پولیس صوبائی دارالحکومت کو منشیات سے پاک کرنے کے لئے سرگرم ِعمل ہے۔انہوں نے کہا کہ پولیس افسران منشیات سے پاک معاشرے کے قیام میں اپنابھرپور کردار ادا کریں۔بلال صدیق کمیانہ نے ہدایات جاری کرتے ہوئے کہا کہ آئس اور ہیروئین سمیت تمام ماڈرن نشوں کے خاتمے کیلئے متحرک ہو کر کام کریں۔انہوں نے کہا کہ منشیات کی آن لائن سپلائی اور استعمال کے خلاف ٹارگٹڈ آپریشنز میں تیزی لائی جائے۔ سی سی پی او لاہور نے کہا کہ منشیات کی سپلائی چین میں ملوث ملزمان کو منطقی انجام تک پہنچایا جائے۔بلال صدیق کمیانہ نے کہا کہ نوجوان نسل کونشے سے محفوظ رکھنے اور منشیات فروشی کے نیٹ ورکس کا قلع قمع لاہور پولیس کا اہم ایجنڈا ہے۔انہوں نے مزید کہا کہ والدین، اساتذہ اور سول سوسائٹی نوجوان نسل کو نشے کی لعنت سے بچانے میں اپنا کردار ادا کریں۔