حکومت ”آرگینک اتھارٹی“کے قیام پر سنجیدگی سے غور کرے‘ نجم مزاری

لاہور( آئی این پی)آرگینک خوراک اور مصنوعات پر ریسرچ کرنے والے ادارے کے سربراہ نجم مزاری نے کہا ہے کہ آرگینک زراعت صرف ایک زرعی تجربہ نہیں بلکہ یہ مقامی معیشت، روزگار اور پاکستان کی زرعی برآمدات کے لیے نئی امید بن سکتی ہے ،اگر حکومت سنجیدگی سے توجہ مرکوز کرے تو اس ”خاموش انقلاب“ کے ذریعے ملک کی برآمدات میں چند سالوں میں کئی گنا اضافہ کیا جا سکتا ہے ۔اپنے بیان میں انہوں نے کہا کہ ملک بھر میں آرگینک زراعت کو فروغ حاصل ہو رہا ہے لیکن ہمیں اسے برآمدی تناظر میں ترقی دینا ہو گی ،پاکستان میں بھی آرگینک خوراک اور مصنوعات کی ڈیمانڈ بڑھ رہی ہے ،آرگینک خوراک کی فروخت سے کسانوں کی اوسط آمدنی میں 28 فیصد اضافہ ریکارڈ کیا گیا ہے ۔نجم مزاری نے کہا کہ آرگینک لیبلنگ کے لیے مستند سرٹیفیکیشن، مقامی لیبارٹریوں کی دستیابی اور کسانوں کی تربیت ترقی کی راہ میں اہم چیلنجز ہیں،حکومت سے مطالبہ ہے کہ وفاقی اور صوبائی سطح پر ”آرگینک اتھارٹیز“کے قیام پر سنجیدگی سے غور کرے تاکہ برق رفتاری سے معاملات آگے بڑھ سکیں ۔دیہی علاقوں میں مقامی سطح پر تیار کی جانے والی آرگینک مصنوعات نئی مارکیٹوں تک رسائی حاصل کر رہی ہیں۔غیر حتمی اعدادوشمار کے مطابق آرگینک خوراک کا استعمال حالیہ دو برسوں میں 1.8 فیصد سے بڑھ کر 4.2 فیصد تک جا پہنچا ہے اور اگر موجودہ رفتار برقرار رہی تو 2030 تک یہ حصہ دوگنا ہو سکتا ہے۔انہوں نے کہا کہ پاکستان کی آرگینک مصنوعات یورپی یونین، خلیجی ممالک اور چین کو برآمد کی جا رہی ہیں، خاص طور پر آرگینک شہد، آم، سبزیاں اور جڑی بوٹیاں عالمی مارکیٹ میں تیزی سے جگہ بنا رہی ہیں لیکن عالمی منڈیوں میںاپنا بھرپور شیئر حاصل کرنے کیلئے بہت کام کرنے کی ضرورت ہے جو حکومتی سرپرستی کے بغیر ممکن نہیں۔