امیداواروں کی فہرست عمران خان نے ہی دی‘سلمان اکرم راجہ

لاہور( آئی این پی) پاکستان تحریک انصاف کے سیکرٹری جنرل سلمان اکرم راجہ نے کہا ہے کہ سینیٹ کا انتخاب براہِ راست ہونا چاہیے، کسی بھی ڈیل کے تحت کسی کو منتخب نہیں کیا جانا چاہیے اور فیصلے بند کمروں میں نہیں ہونے چاہئیں،بیرسٹر سیف کس طرح اڈیالہ جیل میں عمران خان سے ملنے گئے اس پر وہ کیا کہہ سکتے ہیں، لیکن یہ بات طے ہے کہ مرزا آفریدی اور مشعال یوسف زئی کے ناموں کی عمران خان نے منظوری دی ہے۔ایک انٹر ویو میں انہوںنے کہا کہ میں نہیں مانتا کہ بیرسٹر سیف نے یا ہمارے وکیل ظہیرعباس نے جھوٹا بولا ہو، اگر انہوں نے جھوٹ بھی بولا ہوگا تو عمران خان سے ملاقات ہوگی ساری بات سامنے آجائے گی، بیرسٹر سیف اتنے بے وقوف نہیں کہ باہر آکر جھوٹ بولیں۔ایک سوال کے جواب میں سلمان اکرم راجہ نے کہا کہ وہ یہ تو نہیں بتاسکتے کہ عمران خان کے بیٹے کب آئیں گے، لیکن وہ ضرور آئیں گے، وہ اپنے والد کی رہائی کے لیے سرگرم ہیں، آواز بلند کر رہے ہیں اور کرتے رہیں گے، وہ امریکہ جائیں گے مگر پاکستان میں 5 اگست کے احتجاج میں شریک نہیں ہوں گے۔سلمان اکرم راجہ کے مطابق 90 دن کی بات وزیر اعلی خیبرپختونخوا ہ علی امین نے کی تھی، ہماری حقیقی آزادی کی تحریک جو 5 اگست سے شروع ہو رہی ہےں، یہ احتجاج چند ہفتے یا چند ماہ کا ہوسکتا ہے لیکن ایک فیصلہ ہوگیا کہ اب ہم پیچھے ہٹنے والے نہیں ہیں۔عالیہ حمزہ کے حوالے سے سلمان اکرم راجہ نے بتایا کہ ان کی عالیہ حمزہ سے حال ہی میں ملاقات ہوئی ہے اور جو گلہ شکوہ بہن بھائی کے طور پر تھا وہ ختم ہو چکا ہے، ان کے مطابق عمران خان نے پارٹی رہنماﺅں کو ہدایت کی ہے کہ وہ پارٹی کے معاملات نہ سوشل میڈیا پر اور نہ ہی الیکٹرانک و پرنٹ میڈیا میں زیر بحث لائیں۔