پی ایم ایل ٹی سی /یو ای ٹی کے 10طلباءکو اسکالرشپس کا اجراء

لاہور (آئی این پی) پاک مٹیاری لاہور ٹرانسمیشن کمپنی پرائیویٹ لمیٹڈ (پی ایم ایل ٹی سی)نے یو ای ٹی لاہور کے 10الیکٹریکل انجینئرز کو اسکالرشپس سے نوازا۔ اس سلسلے میں سکالرشپ کے چیک تقسیم کرنے کیلئے یونیورسٹی میں تقریب کا انعقاد کیا گیا۔ تقریب میں وائس چانسلر ڈاکٹر شاہد منیر، پی ایم ایل ٹی سی کے چیئرمین / سی ای او شیونگ فینگ نے خصوصی شرکت کی۔ ڈاکٹر شاہد منیر نے چینی وفد کو خوش آمدید کہا اور طلبا کی تعلیمی معاونت پر ان کا شکریہ ادا کیا۔ انہوں نے اپنے خطاب میں کہا کہ ‘یہ اقدام نہ صرف صنعت و جامعہ کے درمیان روابط کو مضبوط کرتا ہے بلکہ پاکستان اور چین کی بڑھتی ہوئی دوستی کا بھی مظہر ہے۔چیئرمین پی ایم ایل ٹی سی شیونگ فینگ نے اس موقع پر تعلیم کے ذریعے نوجوانوں کو بااختیار بنانے کے عزم کا اعادہ کیا۔ انہوں نے کہا کہ یہ سکالرشپ ہر سال یو ای ٹی کے 7ہزار سے زائد طلباءکو دیا جائیگا اور اس تعداد میں مزید اضافہ بھی کیا جائیگا۔ پی ایم ایل ٹی سی سکالرشپ حاصل کرنے والے طلبا کو روزگار بھی فراہم کرے گی کیونکہ یہی طلبا کل کے لیڈر ہیں۔ انہوں نے مزید کہا کہ اسکالرشپس کا مقصد مستحق طلبا پر مالی بوجھ کم کرنا اور علمی معیار کو فروغ دینا ہے۔ تقریب کا اختتام باہمی اظہارِ تشکر کے ساتھ ہوا۔