فنانس ایکٹ سیکشن 37اے میں ترمیم ہوگئی، فیلڈ مارشل نے بزنس کمیونٹی کو کالے قوانین سے بچالیا‘ گوہر اعجاز

لاہور(آئی این پی)سابق نگران وفاقی وزیر گوہر اعجاز نے کہا ہے کہ فیلڈ مارشل سید عاصم منیر نے کاروباری شخصیات کو ایف بی آر کے کالے قوانین سے بچا لیا ہے،ایکس پر اپنے بیان میں گوہر اعجاز نے کہا کہ ٹیکس گزاروں کو آج بڑی کامیابی ملی ہے، فیلڈ مارشل سید عاصم منیر نے کاروباری شخصیات کی عزت کو محفوظ کر لیا ہے، ایف بی آر نے کاروباری برادری کے مطالبے پر فنانس ایکٹ میں ترمیم کردی ہے۔انہوں نے کہا کہ فنانس ایکٹ کے سیکشن 37اے میں ترمیم کردی گئی ہے، کاروباری برادری کی مشاورت کے بغیر کسی تاجر کو گرفتار نہیں کیا جا سکے گا۔انہوں نے کہا کہ ملک بھر کے 18چیمبرز آف کامرس نے فیلڈ مارشل سید عاصم منیر کے سامنے کاروباری شخصیات کی گرفتاری کا معاملہ اٹھایا تھا، کاروباری شخصیات کی گرفتاری سے قبل سیف گارڈز یقینی بنانے کا اعلان کیا گیا تھا۔سابق وفاقی وزیر نے بتایا کہ ایف پی سی سی آئی، چیمبرز آف کامرس اور دیگر سٹیک ہولڈرز ایف بی آر کی کمیٹی کا حصہ ہوں گے، کاروباری شخصیات کے خلاف انکوائری اور انوسٹی گیشن سے قبل کمیٹی کی منظوری لازمی ہے۔ انہوں نے کہا کہ ایف بی آر کی کمیٹی میں اب فیڈرل چیمبر آف کامرس اینڈ انڈسٹری (ایف پی سی سی آئی)دیگر چیمبرز آف کامرس اور اسٹیک ہولڈرز بھی شامل ہوں گے۔گوہر اعجاز نے کہا کہ کاروباری شخصیات کے خلاف انکوائری اور انوسٹی گیشن سے قبل کمیٹی کی منظوری لازمی ہوگی۔