چیف جسٹس لاہور ہائیکورٹ نے دونوں جیلوں کے سپرٹینڈنٹس کو طلب کرلیا

لاہور (آئی این پی) چیف جسٹس لاہور ہائیکورٹ جسٹس مس عالیہ نیلم نے مبینہ پولیس مقابلے کیس میں بڑا حکم دیتے ہوئے شہری کے لاپتہ ہونے پر دونوں جیلوں کے سپرٹینڈنٹس کو 29جولائی کو طلب کرلیا۔ چیف جسٹس مس عالیہ نیلم نے کہا کہ کوٹ لکھپت جیل اور کیمپ جیل کے سپرٹینڈنٹ 29جولائی کو پیش ہوں، چیف جسٹس لاہور ہائیکورٹ مس عالیہ نیلم نے سائرہ بی بی کی درخواست پر سماعت کی، درخواست گزار نے اپنے شوہر تنویر کی بازیابی کے لیے عدالت سے رجوع کیا۔وکیل درخواست گزار نے کہا کہ درخواست گزار کے شوہر کے خلاف 30مقدمات درج ہیں، پولیس نے خاتون کے شوہر کو گرفتار کر کے 17جولائی کو جیل بھیجا، ملزم جیل سے وہاں سے رہا ہوا، اب اس کا کچھ پتہ نہیں۔چیف جسٹس نے وکیل سے مکالمہ کیا کہ آپ جیل جا کر پتہ کریں، وکیل درخواست گزار نے جواب دیا کہ دونوں جیلوں سے معلوم کر چکے ہیں، درخواست گزار کے شوہر کو مبینہ پولیس مقابلے میں ہلاک کر دیا جائے گا۔چیف جسٹس مس عالیہ نیلم نے کہا کہ خدشات کی بنیاد پر کوئی حکم نہیں دے سکتے، پہلے دونوں جیلوں کے سپرٹینڈنٹس کو طلب کرتے ہیں، جیل سپرٹینڈنٹس کا موقف آنے کے بعد کوئی ارڈر پاس کریں گے۔عدالت عالیہ نے سماعت 29 جولائی نوں ملتوی کردی۔