لاہور میں خاتون سمیت 7جعلی پراپرٹی ڈیلرز گرفتار

لاہور (آئی این پی) صوبائی دارالحکومت لاہور سے خاتون سمیت 7جعلی پراپرٹی ڈیلرز کو گرفتار کر لیا گیا ،ملزمان سے شہریوں سے لوٹی گئی 22لاکھ سے زائدکی رقم بھی برآمد کرلی گئی۔اے ایس پی ڈیفنس شہر بانو نقوی نے تھانہ ڈیفنس بی میں پریس کانفرنس کے دوران بتایا کہ ایس ایچ او ڈیفنس اے خرم شہزاد نے پولیس ٹیم کے ہمراہ کارروائی کی ، چوکی انچارج سپر ٹاﺅن آصف اقبال کارروائی میں موجودتھے،ملزمان میں مرکزی ملزم عمران، انور، نعم، عارفِ، ثوبیہ بی بی ودیگرشامل ہیں۔اے یس پی شہر بانو نقوی کا کہنا تھا کہ ملزمان جعلسازی، دھوکہ دہی کے متعدد مقدمات میں ریکارڈ یافتہ نکلے۔ملزمان جعلی شناخت کے ذریعے خود کو مالک یا ایجنٹ ظاہر کرتے تھے،جعلی مالکان کے ذریعے گھر کا معائنہ کرواتے تھے، ملزمان جعلی معاہدوں کے تحت رقم وصول کر کے غائب ہو جاتے تھے۔فراڈ میں اصل مالکان لا علم ہوتے و خریدار مکمل طور پر دھوکہ کھا جاتے تھے،ملزمان جعلی دستاویزات، رجسٹری، اسٹام پیپر اور شناختی کارڈ فراہم کرتے تھے،ملزمان جعلی دستخط یا انگوٹھے لگوا کر شہریوں کو لوٹتے تھے۔انہوں نے بتایا کہ ملزمان پولیس کو زیادہ دیر چکما نہ دے سکے اور دوران انٹیرو گیشن سچ تسلیم کر لیا،ملزمان کو سی سی ٹی وی کیمروں و جدید ٹیکنالوجی کی مدد سے گرفتار کیا گیا،ملزمان کے خلاف مقدمہ درج، مزید تفتیش جاری ہے۔