پنجاب حکومت کامعمر افراد کو تحفظ دینے کےلئے قانون سازی کا فیصلہ

لاہور(آئی این پی) پنجاب حکومت نے بزرگ شہریوں کی فلاح و بہبود کے لیے اہم اقدامات تجویز کرتے ہوئے قانون کامسودہ تیار کرلیا جس کے تحت ”پنجاب سینئر سٹیزنز ویلفیئر کونسل“قائم کی جائے گی۔ قانون کے تحت بزرگ شہریوں کی سماجی، طبی، قانونی اور معاشی فلاح کے لئے اقدامات اٹھائے جائیں گے ۔ بل کے مسودے کے مطابق 70سال یا زائد عمر والے شہری سینئر سٹیزن کہلائیں گے،بزرگ شہریوں کے لیے خصوصی فنڈ ”سینئر سٹیزنز ویلفیئر فنڈ“قائم ہوگا،کونسل کو فنڈز، عطیات، حکومتی گرانٹس اور ڈونیشنز حاصل ہوں گی،بے سہارا، لاوارث، معذور یا بغیر آمدن بزرگوں کو مالی امداد دی جائے گی۔ قانون کے تحت حکومت بزرگ شہریوں کے لیے اولڈ ہومز، مفت علاج اور قانونی مدد فراہم کرے گی،بزرگوں کو پبلک پارکس، لائبریریز، میوزیمز میں مفت داخلے کی سہولت حاصل ہو گی ۔پنجاب سینئر سٹیزنز ویلفیئر بل 2025 اسمبلی میں پیش کردیا گیا جو قائمہ کمیٹی کے سپرد ہے اور اراکین کے بحث و مباحثے کے بعد اس کی منظوری دی جائے گی۔قانون کے مسودے کے مطابق بزرگ شہریوں کے لیے الگ کاﺅنٹرز، پبلک مقامات پر ریمپس، ٹرانسپورٹ سہولیات شامل ہوں گی ،سینئر سٹیزنز کے لیے ہیلپ لائن بھی قائم ہوگی،ہر سرکاری ہسپتال میں بزرگوں کی نگہداشت خدمات کی فراہمی لازم قرار دی گئی ہے ۔ بل کے مطابق کونسل سالانہ کارکردگی رپورٹ اسمبلی کو پیش کرے گی۔بل کی منظوری سے پنجاب میں معمر افراد کو قانونی تحفظ اور باوقار زندگی ملے گی۔ وزیر سماجی بہبود کونسل کے چیئرمین، مختلف محکموں کے سیکرٹریز رکن ہوں گے ۔بل کے تحت کونسل کو ضوابط بنانے، فنڈز کا بجٹ تیار کرنے اور پالیسی وضع کرنے کا اختیار حاصل ہوگا۔بل کی منظوری کے بعد حکومت پنجاب متعلقہ قوانین و ضوابط بھی بنائے گی۔