پی ٹی آئی کے سزا یافتہ رہنماﺅں کو اوپر کی عدالتوں سے ریلیف ملے گا، سابق وفاقی وزیر

لاہور(آئی این پی) سابق وفاقی وزیر اسد عمر نے کہا ہے کہ پی ٹی آئی سے کوئی بات نہیں کر رہا، اس وقت ان کے پاس احتجاج کے علاوہ کوئی اور راستہ نہیں بچا،میری وہی پرانی بات ہے کہ سیاست کے ذریعے مسئلے کا حل کیا جائے، امید ہے کہ جن پی ٹی آئی رہنماﺅں کو سزا ملی ہے انہیں اوپر کی عدالتوں سے ریلیف ملے گا۔لاہور میں انسداد دہشت گردی عدالت کے باہر میڈیا سے گفتگو کرتے ہوئے اسد عمر نے کہا کہ سیاسی جماعتیں ساتھ بیٹھیں اور مذاکرات کریں، پی ٹی آئی سے کوئی بات نہیں کر رہا، وہ احتجاج نہیں کریں گے تو اور کیا کریں گے؟، ان کے پاس سوائے احتجاج کے اور کوئی رستہ نہیں چھوڑا جا رہا۔اسد عمر نے کہا کہ تحریک انصاف کے لوگوں کو سزائیں ہو رہی ہیں، جن لوگوں کو سزائیں ہوئیں میں ان سب کو ذاتی طور پر جانتا ہوں، پاکستان کی سیاست میں یہ تمام لوگ تشدد کی سیاست کرنے پر یقین نہیں رکھتے، میری وہی پرانی بات ہے کہ سیاست کے ذریعے مسئلے کا حل کیا جائے، تحریک انصاف والوں سے اس وقت کیا کہا جا سکتا ہے، ان کو تو سزائیں ہو رہی ہیں میری ہمدردی تمام لوگوں کے ساتھ ہےں ، اس وقت پی ٹی آئی والوں کے پاس احتجاج کے علاوہ کوئی اور راستہ ہی نہیں بچا۔جب یہ تمام لوگ اوپر عدالت میں جائیں گے تو انصاف ملے گا۔