جب بھی انتخابات ہونگے عوام 8فروری پلس کی طرز پر خاموش انقلاب برپا کرینگے‘ مسرت چیمہ

لاہور(آئی این پی) پاکستان تحریک انصاف کی سینئر رہنما مسرت جمشید چیمہ نے کہا ہے کہ پی ٹی آئی کی قیادت ،رہنما اور کارکنان بلا تعطل ہونے والے ظلم اور جبر کے عادی ہو چکے ہیں، ان شا اللہ عمران خان کی جدوجہد ضرور رنگ لائے گی اور ایک دن ملک میں آئین و قانون کی حقیقی عملداری نظر آئے گی ،عمران خان اور بشری بی بی صبر اور استقامت کے ساتھ جیل کی صعوبتیں برداشت کر رہے ہیں جس کی وجہ سے جعلی حکمرانوں کی سیاست کی نبض ڈوب رہی ہے ۔ ان خیالات کا اظہار انہوں نے جمشید اقبال چیمہ کے ہمراہ حماد اظہر سے ان کے والد میاں اظہر کے انتقال پر اظہار تعزیت اور فاتحہ خوانی کے بعد میڈیا سے گفتگو کرتے ہوئے کیا ۔ مسرت جمشید چیمہ نے کہا کہ موجودہ رجیم ظلم اور جبر کے تما م حربے آزما چکی ہے لیکن عمران خان کی محبت کو کارکنان اور عوام کے دلوں سے نہیں نکالا جا سکا ، میرا دعویٰ ہے جب بھی انتخابات ہوں گے عوام 8فروری پلس کا خاموش انقلاب برپا کریں گے اور اس بار کوئی عوام کے مینڈیٹ پر ڈاکہ نہیں ڈال سکے گا ۔ جمشید اقبال چیمہ نے کہا کہ نام نہاد تجربہ کاروں نے معیشت کا بیڑہ غرق کر دیا ہے ، مسلم لیگ (ن) کی حکومت جعلی اعدادوشمار پیش کرنے کیلئے مشہور ہے اور یہی وجہ ہے کہ عالمی ادارے ان کے اعدادوشمار پر اعتبار نہیں کرتے ۔ انہوں نے کہا کہ ملک میں غربت اور مہنگائی اپنی انتہا پر پہنچ چکی ہے اور جعلی حکمران ہٹ دھرمی کے ساتھ سب اچھا کی رپورٹ دے کر آنکھوں میں دھول جھونک رہے ہیں۔