پنجاب میں یوم شہدا پولیس منایا گیا، مختلف شہروں میں تقریبات کا انعقاد

لاہور(آئی این پی) پنجاب بھر میں پیر کو یوم شہدا پولیس منایا گیا اور اس موقع پر مختلف شہروں میں تقریبات کا انعقاد کیا گیا ہے۔ترجمان پنجاب پولیس کے مطابق پنجاب سمیت ملک بھر میں 4 اگست کو یوم شہدا پولیس کے طور پر منایا جاتا ہے۔کئی شہروں میں پولیس کے شہداءکی یاد میں شمعیں روشن کی گئیں، آر پی او، سی پی اوز، ڈی پی اوز سمیت سینئر پولیس افسروں نے شرکت کی، شہدائے پولیس کے اہل خانہ، سول سوسائٹی، شہریوں کی کثیر تعداد نے بھی شرکت کی۔شہدا کی یادگاروں سمیت مختلف مقامات پر شمعیں روشن کر کے شہدائے پولیس کو خراج عقیدت پیش کیا گیا۔آئی جی پنجاب ڈاکٹر عثمان انور نے کہا کہ شہدائے پولیس کی لازوال قربانیوں کو ہمیشہ یاد رکھا جائے گا، شہدائے پولیس جرات و بہادری اور ملک و قوم سے وفا کے پیکر ہیں، شہدائے پولیس کی فیملیز کی فلاح و بہبود اور ویلفیئر کا مکمل خیال رکھا جا رہا ہے۔ڈاکٹر عثمان انور نے کہا کہ یومِ شہداءپولیس، شہداءکے ساتھ تجدیدِ عہد کا دن ہے اور زندہ قومیں کبھی اپنے ہیروز کو فراموش نہیں کرتیں۔ انہوں نے عزم ظاہر کیا کہ شہداءکے اہلخانہ کی بہترین فلاح و بہبود اور دیکھ بھال ان کی اولین ترجیح ہے۔