پناہ گاہ منصوبے کے کنٹریکٹ ملازمین کو مستقل کرنے کی اپیلیں خارج

لاہور (آئی این پی) لاہور ہائیکورٹ نے پناہ گاہ منصوبے کے کنٹریکٹ ملازمین کی مستقل تقرری کی اپیلیں خارج کردیں،عدالت کا تحریری فیصلے میں کہنا ہے کہ ملازمت کی مستقلی بنیادی حق نہیں۔لاہور ہائیکورٹ نے پناہ گاہ منصوبے کے کنٹریکٹ ملازمین کی مستقل تقرری کی اپیلیں خارج کرتے ہوئے تحریری فیصلہ جاری کردیا۔ جس میں کہا گیا ہے کہ ملازمت کی مستقلی بنیادی حق نہیں، مستقل ملازمت ایک رعایت ہے جو پالیسی اور قانونی شرائط سے منسلک ہے۔عدالت کا کہنا ہے کہ حکومت چاہے تو مخصوص شرائط کے تحت اس رعایت کا اختیار استعمال کرسکتی ہے، 2018ءکے ریگولرائزیشن ایکٹ کا اطلاق پراجیکٹ پوسٹوں پر نہیں ہوتا، اس ایکٹ میں پراجیکٹ ملازمین کو ملازم کی تعریف سے خارج کیا گیا ہے، آئینی عدالتیں خود سے ملازم کا درجہ تبدیل کرنے کی مجاز نہیں۔لاہور ہائیکورٹ کے جسٹس عاصم حفیظ اور جسٹس ملک محمد اویس خالد پر مشتمل 2 رکنی بینچ نے کیس پر فیصلہ جاری کیا، پناہ گاہ کے کنٹریکٹ ملازمین نے سنگل بینچ کے مستقل نہ کرنے کے فیصلے کو چیلنج کیا تھا۔