مریم نوازکا جشن آزادی پرصوبے بھر میں صفائی ستھرائی کے بہترین انتظامات کا حکم
لاہور (آئی این پی)وزیراعلیٰ پنجاب مریم نوازشریف نے جشن آزادی پرصوبے بھر میں صفائی ستھرائی کے بہترین انتظامات کی ہدایت کی ۔ تمام محکموں کو جشن آزادی کی تقریبات کے دوران عوام کو بہترین سہولیات فراہم کرنے کا حکم دیا ہے۔ وزیراعلیٰ مریم نواز شریف نے فیمیلیز کی آمد کے پیش نظر عوامی مقامات پر سکیورٹی اور ٹریفک کے بہترین انتظامات یقینی بنانے کی بھی ہدایت کی۔وزیراعلیٰ مریم نوازشریف نے پنجاب بھر میں ضلعی انتظامیہ کو جشن آزادی کی تقاریب، ریلیوں سمیت دیگر تقاریب میں شہری تنظیموں کی بھرپور معاونت کرنے کی ہدایت کی۔پنجاب بھر کے شہروں اور دیہات میں جشن آزادی کے رنگ قوس و قزح کی مانندبکھر گئے ۔ شہروں اور دیہات میں عوام کا گھروں پر پرچم لہرانے کا سلسلہ جاری ہے۔ گاڑیوں، موٹر سائیکلوں، رکشوں، ٹرالیوں اور ٹرکس کو بھی خوبصورتی سے سجادیاگیا ۔ سرکاری اور نجی عمارتوں، پارکس، چوک چوراہوں، بازاروں، شاہراہوں کوبھی جھنڈوں اور جھنڈیوں سے سجانے کا سلسلہ جاری ہے۔ برقی قمقموں اور چراغاں سے علاقوں اور عمارتوں کا حُسن دوبالا ہوگیا۔ لاہور، راولپنڈی، مری،کوٹلی ستیاں، جھنگ، لیہ، سیالکوٹ، مرید کے، شیخو پورہ، گوجرانوالہ، جہلم،چکوال اوراٹک میں آرائش وزیبائش کے خوبصورت مناظر نے شہریوں کو تفریح کا موقع بھی فراہم کردیا۔ فیصل آباد، خانیوال، بہاولپور، ملتان، بھکر، منڈی بہاﺅالدین اور سرگودھا میں بھی بازار، گلیاں، راستے اور چوراہے سجادئیے گئے ۔ قومی یادگاروں پر بھی چراغاں کیاگیا ۔ شام ہوتے ہی شہری چراغاں اور ر ونق دیکھنے سڑکوں پر نکل آتے ہیں۔
