موسمی خرابی کے سبب فلائٹ شیڈول متاثر،23پروازیں منسوخ

لاہور (آئی این پی)پنجاب میں سیلاب، ملک بھر کے مختلف شہروں میں موسمی خرابی اور انتظامی مسائل کے نتیجے میں 23پروازیں منسوخ جبکہ فلائٹ شیڈول بھی شدید متاثر ہوا ہے۔فلائٹ شیڈول کے مطابق ملک بھر کی 48ملکی اور غیرملکی پروازوں کی آمد و روانگی تاخیر کا شکار رہی جس کے باعث مسافروں کو مشکلات کا سامنا کرنا پڑا۔ گزشتہ روز سیالکوٹ ایئرپورٹ کی غیر ملکی ایئرلائن کی 14پروازیں منسوخ ہوگئیں۔سیالکوٹ ایئر پورٹ کی دیگر تمام پروازیں ہفتے کے روز بھی لاہور سے آپریٹ کی جاتی رہیں، سیالکوٹ ایئرپورٹ کی دبئی کی ایک پرواز لاہور اتاری گئی ۔موسمی خرابی کے سبب ابوظبی سے پشاور کی پرواز پی کے 218ملتان میں اتاری گئی جبکہ اسلام آباد کراچی کی پرواز پی اے201منسوخ کردی گئی ۔فلائٹ شیڈول کے مطابق اسلام آباد گلگت کی 4پروازیں پی کے601، 602، 603، 604منسوخ کردی گئی ، کراچی اسکردو کی نجی ایئر کی دو پروازیں پی اے 704اور 705بھی منسوخ کردی گئی ۔فلائٹ شیڈول کے مطابق لاہور اسکردو کی دو پروازیں پی اے 480، 481 بھی منسوخ ہوئی، اسلام آباد ایئرپورٹ کی 18پروازوں میں 1سے 6گھنٹے تاخیر ہوئی۔فلائٹ شیڈول کے مطابق لاہور ایئرپورٹ کی 15پروازوں میں 1سے7 گھنٹے تاخیر ہوئی ، کراچی ایئرپورٹ کی 10پروازوں میں 1سے سوا 5گھنٹے تک تاخیر ہوئی۔فلائٹ شیڈول کے مطابق کراچی ،اسلام آباد کی 6پروازوں میں 1سے 6 گھنٹے تاخیر ہو ئی جبکہ کراچی لاہور کے مابین 5پروازوں میں 1سے پونے 3گھنٹے کی تاخیر ہوئی۔