الحمراءاور ہسپانو ی سفارتخانہ کے زیر اہتمام شاندار میوزک پروگرام کا انعقاد 30ستمبر کو ہو گا
لاہور (آئی این پی) لاہور آرٹس کونسل الحمراءعالمی فنون کے فروغ اور تہذیبی رشتوں کو مستحکم کرنے کے عزم کے ساتھ 30 ستمبر کی شام 7 بجے الحمراءآرٹس سنٹر کے ہال نمبر 2 میں ایک شاندار بین الاقوامی موسیقی کی شام کا اہتمام کر رہا ہے، جس میں دنیا کے ممتاز موسیقار اپنے فن کا جادو جگائیں گے۔اس تقریب میں اسپین کے عالمی شہرت یافتہ سیلولسٹ الڈو ماٹااور معروف آرٹسٹ Qi-Shen اپنی دلکش اور پُراثر پرفارمنس سے ناظرین کو مسحور کریں گے۔ الڈو ماٹا پہلے بھی الحمراءکے اسٹیج کو اپنی بےمثال دُھنوں سے منور کر چکے ہیں جبکہQi- Shen اپنے نایاب فن کی بدولت پہلی بار لاہور کے ناظرین کے دل جیتنے آ رہی ہیں۔چیئرمین الحمراءرضی احمد نے اس حوالے سے کہا کہ یہ کنسرٹ نہ صرف پاکستان اور اسپین کے مابین ثقافتی تعلقات کو مزید گہرا کرے گا بلکہ موسیقی کے ذریعے محبت، ہم آہنگی اور بین الاقوامی ربط کو بھی فروغ دے گا۔ ایگزیکٹوڈائریکٹر الحمراءمحمد محبوب عالم چوہدری نے کہا کہ الحمراءکی جانب سے یہ ایک اور یادگار موقع ہے جو فنونِ لطیفہ کے فروغ اور عالمی سطح پر پاکستان کے مثبت تشخص کے اظہار کی درخشاں کڑی ثابت ہوگا۔
