ریلوے کے 8372 مرلے پر اداروں کا قبضہ ہونے کا انکشاف

لاہور( آئی این پی)پاکستان ریلوے کی 5ارب 63 کروڑ روپے سے زائد مالیت کی 8 ہزار 372 مرلے سے زائد اراضی پر نجی و سرکاری اداروں کی تجاوزات قائم ہیں۔ یہ انکشاف ریلوے آڈٹ رپورٹ برائے 2024-25میں ہوا ہے ۔رپورٹ کے مطابق ریلوے کی قیمتی اراضی پر نجی اور سرکاری اداروں کی جانب سے تجاوزات قائم کرلی گئی ہیں، ریلوے کی 8 ہزار 372 مرلے سے زائد اراضی پر نجی و سرکاری اداروں نے قبضہ کر رکھا ہے، اراضی کی مالیت 5 ارب 63 کروڑ 40لاکھ روپے سے زائد ہے۔آڈٹ رپورٹ میں بتایا گیا ہے کہ ریلوے اراضی پر تجاوزات 1980 سے 2024 کے دوران قائم کی گئیں، مسلسل تین سال 2019-20، 2021-22اور 2023-24کی آڈٹ رپورٹ میں معاملے کی نشاندہی کی گئی۔رپورٹ میں کہا گیا ہے کہ بار بار ایک ہی معاملے کا سامنے آنا تشویش کا باعث بن رہا ہے۔ حکام کی جانب سے سفارش کی گئی ہے کہ ریلوے زمین کی ریکوری کے جلد از جلد اقدامات کیے جائیں، ریلوے اراضی پر تجاوزات کیوں ہوئیں ذمہ داران کا تعین بھی کیا جائے۔