سید محمد حسین ساملی ہسپتال اینڈ نواز شریف کارڈیالوجی سنٹر کے حوالے سے اہم اجلاس
لاہور (آئی این پی)محکمہ سپیشلائزڈ ہیلتھ کیئر اینڈ میڈیکل ایجوکیشن میں سید محمد حسین ساملی ہسپتال اینڈ نواز شریف کارڈیالوجی سنٹر کے حوالے سے اہم اجلاس منعقد ہوا۔صوبائی وزیر صحت خواجہ سلمان رفیق اور سیکرٹری صحت عظمت محمود خان نے اجلاس کی صدارت کی۔اجلاس میں چیئرمین وزیر اعلیٰ پنجاب ایڈوائزری کمیٹی برائے امراض قلب ڈاکٹر فرقد عالمگیر، ڈاکٹر عدنان خان، سپیشل سیکرٹری آپریشنز طارق محمود رحمانی، سپیشل سیکرٹری ڈویلپمنٹ ذیشان شبیر رانا، چیف پلاننگ آفیسر عبدالحق بھٹی، ایڈیشنل سیکرٹری امیر محمد، ایڈیشنل سیکرٹری انور بریار و دیگر افسران نے شرکت کی۔اجلاس کے دوران محکمہ سی اینڈ ڈبلیو کو کام جلد مکمل کرنے کی ہدایت کی گئی۔صوبائی وزیر صحت خواجہ سلمان رفیق اور سیکرٹری صحت عظمت محمود خان نے اجلاس کے دوران سید محمد حسین ساملی ہسپتال اینڈ نواز شریف کارڈیالوجی سنٹر پر جاری پیش رفت کا جائزہ لیا۔سپرنٹینڈنٹ انجینئر محکمہ بلڈنگز راولپنڈی عمران علی ستی، ایم ایس و دیگر افسران نے جاری پیش رفت بارے بریفنگ بھی دی۔اجلاس کے دوران اس ہسپتال کو اپ گریڈ کرنے کیلئے طبی سامان و ایچ آر کی تازہ صورتحال کا جائزہ لیا ۔صوبائی وزیر صحت خواجہ سلمان رفیق نے کہاکہ وزیر اعلیٰ پنجاب مریم نواز شریف کے ویڑن کے مطابق مری اور گردونواح کی عوام کو کارڈیک کی جدید سہولیات فراہم کر رہے ہیں۔ سید محمد حسین ساملی ہسپتال اینڈ نواز شریف کارڈیالوجی سنٹر انشاءاللہ مری و گردونواح کیلئے ایک بہترین علاج گاہ ثابت ہو گا۔ خواجہ سلمان رفیق نے کہاکہ حکومت پنجاب اس ہسپتال کیلئے تاریخ میں پہلی بار کروڑوں روپوں کی جدید مشینری خریدنے جا رہی ہے۔ اس ہسپتال میں کیتھ لیب کیلئے ایچ آر اور طبی سامان ہنگامی بنیادوں پر مہیا کئے جا رہے ہیں۔سیکرٹری محکمہ سپیشلائزڈ ہیلتھ کیئر اینڈ میڈیکل ایجوکیشن عظمت محمود خان نے کہاکہ سید محمد حسین ساملی ہسپتال اینڈ نواز شریف کارڈیالوجی سنٹر میں فوری طور پر ایچ آر کے مسائل حل کئے جا رہے ہیں۔ سید محمد حسین ساملی ہسپتال اینڈ نواز شریف کارڈیالوجی سنٹر کو راولپنڈی انسٹی ٹیوٹ آف کارڈیالوجی کے ساتھ منسلک کرنے کے بعد مثبت اور درکار نتائج حاصل ہوں گے۔ صوبائی سیکرٹری صحت نے متعلقہ افسران کو اس ہسپتال سے متعلق سونپی گئی ذمہ داریوں پر عملدرآمد کو یقینی بنانے کی ہدایت کی ۔ویڈیو لنک کے ذریعے ایم ایس سید محمد حسین ساملی ہسپتال اینڈ نواز شریف کارڈیالوجی سنٹر ڈاکٹر قیصر محمود عباسی و دیگر نے شرکت کی۔
