عمران خان کی رہائی کے لیے 5 اگست کو ملک گیر احتجاج ہو گا‘ شاہ فرمان

لاہور(آئی این پی)پاکستان تحریک انصاف کی کور کمیٹی کے رکن و سابق گورنر خیبر پختونخوا ہ شاہ فرمان نے اعلان کیا ہے کہ 5 اگست کو عمران خان کی رہائی کے لیے ملک بھر میں یونین کونسل کی سطح سے لے کر شہروں تک احتجاجی مظاہرے ہوں گے۔ایک انٹر ویو میں گفتگو میں شاہ فرمان نے کہا کہ 5 اگست عوامی فیصلہ ہو گا، لوگ بتائیں گے کہ عمران خان کو رہا کرنا ہے یا نہیں۔انہوں نے دعوی کیا کہ ملک کی 95 فیصد آبادی عمران خان کے ساتھ ہے اور وہ ان کی رہائی چاہتی ہے۔انہوں نے کہا کہ تحصیل، یونین کونسل اور شہری سطح پر ہر جگہ عوام باہر نکلے گی اور پرامن احتجاج کیا جائے گا۔عمران خان کی رہائی کے امکانات کے بارے میں سوال پر انہوں نے کہا کہ کوششیں جاری ہیں، مگر رہائی کب ممکن ہو گی، اس پر کچھ کہنا قبل از وقت ہے۔انہوں نے عمران خان کے بیٹوں کے بارے میں بھی بات کی اور بتایا کہ وہ اس وقت امریکہ میں ہیں اور اپنے والد کی رہائی کے لیے سرگرم کوششیں کر رہے ہیں،یہ ان کا حق ہے کہ وہ اپنے والد کے لیے آواز اٹھائیں۔انہوں نے امکان ظاہر کیا کہ عمران خان کے بیٹے پاکستان آ کر احتجاج میں بھی شریک ہو سکتے ہیں، تاہم ان کی آمد اور شرکت سے متعلق کوئی حتمی شیڈول پارٹی کے پاس موجود نہیں۔