اسرائیل اپنا دائرہ وسیع کرتا جا رہا ، اب ذمہ داری مسلم امہ پر آگئی ہے‘ خواجہ محمد آصف

لاہور (آئی این پی) وزیر دفاع خواجہ محمد آصف نے کہا ہے کہ اسرائیل اپنا دائرہ وسیع کرتا جا رہا ہے، اب ذمہ داری مسلم امہ پر آگئی ہے،پاکستان نے کم وسائل کے باوجود اپنے سے 5گنا بڑے دشمن کو شکست دی،امت مسلمہ کو پاکستان کو فالو کرنا چاہیے۔انہوں نے نجی ٹی وی سے گفتگو کرتے ہوئے کہا کہ غزہ اور دیگر ممالک پر اسرائیلی حملے بڑی طاقتوں کی سرپرستی میں ہو رہے ہیں، غزہ پر مظالم کی مثال دنیا کی تاریخ میں نہیں ملتی، بڑی طاقتوں نے اربوں ڈالر کا اسلحہ اس قتل عام کے لیے اسرائیل کو مہیا کیا۔خواجہ آصف نے کہا کہ سب کو معلوم ہے کہ اسرائیل کی پشت پناہی کون کر رہا ہے، یہ ایک حقیقت ہے کہ اس کے پیچھے برطانوی اور امریکی حکومتیں ہیں، اقوام متحدہ میں جو ووٹ پڑا ہے سب کو معلوم ہے۔وفاقی وزیر نے کہا کہ مسلم امہ کو اپنے گریبان میں جھانکنا چاہیے، مسلم امہ کو جاگنا پڑے گا، پوری مسلم امہ کے سامنے صرف ایک مثال ہے اور وہ پاکستان ہے، پاکستان کے پاس وسائل کم ہیں لیکن اپنے سے 5گنا بڑے دشمن کو شکست دی۔ان کا کہنا ہے کہ امت مسلمہ کو پاکستان کو فالو کرنا چاہیے، پاکستان کو مثال بنا کر متحد ہونا چاہیے، ایشیا کے اندر نیا پاور سینٹر تشکیل پا رہا ہے وہ مستقبل ہے۔انہوں نے کہا کہ یہ بات درست ہے کہ قوم مزید سیلابی نقصانات کی متحمل نہیں ہوسکتی، دریاﺅں اور نالوں سے تجاوزات ختم ہونی چاہئیں، ہم مزید نقصان سے بچ سکتے ہیں، ڈیم بنانے سے قبل جو اقدامات کر سکتے ہیں وہ کریں۔خواجہ آصف نے کہا کہ دریاﺅں کے ارد گرد جو تعمیرات ہوئی ہیں وہ چھپ کر تو نہیں بنیں، سب کے سامنے بنی ہیں۔