صوبائی وزیر رمیش سنگھ اروڑہ کا دورہ گوجرانوالہ
قطر کے مقابلوں میں جیتنے والے پاکستانی کھلاڑیوں میں ایک ایک لاکھ روپے کےنقد انعامات تقسیم
اقلیتوں کے تحفظ اور دیگر انتظامات بارے منعقدہ اجلاس کی صدارت
گوجرانوالہ ۔13 جولائی 2025:(رانا عبدالغفار خاں )صوبائی وزیر برائے اقلیتی امور سردار رمیش سنگھ اروڑہ نے گوجرانوالہ کے دورے کے دوران کمشنر دفتر میں ایک خصوصی اجلاس کی صدارت کی، جس میں کمشنرسید نوید حیدر شیرازی، ڈی سی نوید احمد،،ڈی ایس او فیصل امیر خان کے ساتھ ساتھ مقامی مسیحی رہنماؤں، کلیسیا نمائندگان، سول سوسائٹی اراکین اور اقلیتی برادری کے افراد نے شرکت کی۔اجلاس میں رمیش سنگھ اروڑہ نے قطر میں جاری بین الاقوامی مقابلوں میں تین گولڈ میڈلز اور ایک برونز میڈل حاصل کرنے والے گوجرانوالہ سے تعلق رکھنے والے کھلاڑیوں میں ایک ایک لاکھ روپے کے نقد انعامات تقسیم کرتے ہوئے کہا کہ پنجاب حکومت کی جانب سے ان باصلاحیت کھلاڑیوں کو نقد انعامات کی تقسیم ایک خوش آئند اقدام ہے، جو نوجوان نسل کو کھیلوں میں حصہ لینے کی حوصلہ افزائی فراہم کرتا ہے تاہم یہ اقدام ‘کھیلتا پنجاب’ وزیراعلی پنجاب مریم نواز کے وژن کا عملی ثبوت ہے۔ مریم نواز خواہاں ہیں کہ پنجاب بھر میں کھیلوں کے میدانوں کو آباد کیا جائے اور نوجوان نسل کو کھیلوں کے مواقع فراہم کئے جائیں تاکہ پاکستان کا نام دنیا بھر میں روشن کیا جا سکےاجلاس سے خطاب کرتے ہوئے رومیش سنگھ اروڑہ نے کہا کہ وزیراعلیٰ پنجاب مریم نواز کے وژن کے مطابق پنجاب حکومت مذہبی اقلیتوں کے تحفظ، ترقی، تعلیم اور مکمل مذہبی آزادی کو ترجیح دے رہی ہے۔ اقلیتی برادری کو ہر سطح پر بااختیار بنایا جا رہا ہے تاکہ وہ ملکی ترقی کا فعال حصہ بن سکیں۔انہوں نے تاکید کی کہ مذہبی اقلیتوں کی عبادات، تقریبات اور مذہبی مقامات کے تحفظ کو ہر ممکن طریقے سے یقینی بنایا جائے۔انہوں نے زور دیا کہ ضلعی بین المذاہب ہم آہنگی کمیٹیوں کو فعال بنایا جائے تاکہ مقامی سطح پر اعتماد، رواداری اور بھائی چارے کو فروغ دیا جا سکے۔انہوں نے ضلعی افسران اور مقامی رہنماؤں سے کہا کہ وہ اقلیتوں کے مسائل حل کرنے کے لیے قریبی رابطہ رکھیں اور انہیں ہر سطح پر عزت و وقار کے ساتھ نمائندگی دی جائے۔
