کراچی (نامہ نگار )کراچی تاجر الائنس کے چیئرمین و بانی "عام آدمی پاکستان” ایاز میمن موتی والا نے شہرِ قائد میں اسٹریٹ کرائمز کے بڑھتے ہوئے واقعات پر گہری تشویش کا اظہار کیا ہے۔ انہوں نے کہا کہ روزانہ درجنوں شہری اپنی قیمتی جانوں اور محنت کی کمائی سے محروم ہو رہے ہیں، مگر مؤثر حکمتِ عملی کے فقدان کے باعث حالات بد سے بدتر ہوتے جا رہے ہیں۔
ایاز میمن موتی والا نے کہا کہ کراچی کی حالتِ زار دیکھ کر افسوس ہوتا ہے، یہ شہر ملک کی معاشی شہ رگ ہے مگر یہاں کے شہری ہر روز خوف کے سائے میں زندگی گزارنے پر مجبور ہیں۔انہوں نے زور دیا کہ تمام سیاسی جماعتیں اس مسئلے پر اختلافات بالائے طاق رکھ کر متحد ہوں اور پولیس و رینجرز کے ساتھ مکمل تعاون کریں تاکہ جرائم پیشہ عناصر کے خلاف مؤثر کارروائی ممکن ہو سکے۔
انہوں نے کہا کہ کراچی ہم سب کا ہے، اس کے امن اور ترقی کے لیے اجتماعی کوششیں ہی دیرپا حل فراہم کر سکتی ہیں۔
ایاز میمن موتی والا نے مطالبہ کیا کہ حکومت قانون نافذ کرنے والے اداروں کو مزید وسائل اور اختیارات فراہم کرے تاکہ شہریوں کا اعتماد بحال ہو اور کراچی دوبارہ روشنیوں کا شہر بن سکے۔
