کال سینٹرز کے خلاف آپریشن جاری ، درجنوں ملزمان گرفتار

لاہور( آئی این پی)ملک بھرمیں غیرقانونی کال سینٹرز کے خلاف فیصلہ کن کارروائیاں جاری ہیں،مالی فراڈ کا بڑا عالمی نیٹ ورک چلانے والوں کے پاکستان میں موجود 16ٹھکانوں پر چھاپے مارے گئے۔نیشنل سائبر کرائم انویسٹی گیشن اتھارٹی کی”گرے آپریشن“کے نام سے ملک گیر کارروائیاں جاری ہیں جس میں درجنوں ملزمان کو گرفتارکرلیا گیا۔ذرائع کے مطابق ایک ایک کال سینٹر میں پچاس سے پانچ سو نوجوان کو بھرتی کیا جاتا تھا،وی پی این اور مخصوص سافٹ ویئرز کے ذریعے امریکہ ، بھارت، پرتگال، یونان سمیت کئی ممالک کی پروفائلنگ پاکستان میں کیے جانے کا انکشاف ہوا ہے۔آن لائن شاپنگ اور سیروتفریح کے شوقین افراد ملزمان کا آسان ہدف ہے،ڈیٹا پاکستان سے بیرون ملک گروہوں تک پہنچایا جاتا،جہاں اس عالمی نیٹ ورک کے کارندے لاکھوں ڈالرزکا فراڈ کرتے تھے،کئی غیرقانونی کال سینٹرز ایس ای سی پی سے رجسٹریشن لے کر خود کو قانونی ظاہر کرتے رہے،مگر حقیقت میں یہ ہائی ٹیک فراڈ فیکٹریاں چلا رہے تھے۔ ڈپٹی ڈائریکٹر این سی سی آئی اے محمود الحسن کے مطابق ایک ماہ میں ہم نے 16 کال سینٹرز کے اوپر چھاپے مارے اورکافی سارے غیر ملکیوںاور مقامی لوگوں کو پکڑا ہے،خاص کرجو والدین اپنے بچوں کو کال سینٹرز میں بھیجتے ہیں ان کو ضرور تصدیق کریں کہ وہ کون سے کال سینٹر میں کام کر رہے ہیں اور وہاں پر کیا سر گرمیاں چل رہی ہےں۔این سی سی آئی اے کی ابتدائی تحقیقات میں غیر قانونی کال سینٹرز کی جانب سے عالمی سطح پر پاکستان کے تشخص کو نقصان پہنچانا ہے،ذمہ داروں کو سخت سزائیں دلوائی جائیں گی۔