لاہور: ناقص کھانوں کی بھر مار ، شہری فوڈ پوائزننگ کے شکار

لاہور (آئی این پی ) رائےونڈ ، سندر ، مانگا منڈی ، چوہنگ ، موہلنوال ، گلیمر، تالاب سرائے ، شامکی بھٹیاں ، سندر اسٹیٹ کے مختلف ہوٹلوں اور کھانے پینے کی دکانوں پر ناقص اور غیر معیاری کھانے فروخت کیے جانے کی اطلاعات بڑھ رہی ہیں جس کے باعث شہری مختلف بیماریوں کا شکار ہو رہے ہیں۔ شہریوں کی جانب سے بار بار شکایات کے باوجود پنجاب فوڈ اتھارٹی کی جانب سے کاروائیوں میں تساہل اور خاموشی کا مظاہرہ کیا جا رہا ہے، جس پر عوامی حلقوں میں شدید تشویش پائی جاتی ہے۔شہر کے مختلف علاقوں میں ہوٹلوں اور کھانے کے چھوٹے بڑے مراکز میں صفائی ستھرائی کے ناقص انتظامات دیکھنے میں آئے ہیں۔ کچن کی حالت انتہائی خراب ہے اور باورچی خانے میں صفائی کے اصولوں کی کھلی خلاف ورزی کی جا رہی ہے۔ استعمال شدہ برتن اور کچن کا سامان گندگی سے اٹا ہوا ہوتا ہے، جبکہ ہوٹلوں کے باہر اور ارد گرد کوڑے کے ڈھیر لگے ہوئے ہیں، جس کی بدبو سے وہاں بیٹھ کر کھانا کھانا مشکل ہو جاتا ہے۔ان ہوٹلوں پر استعمال ہونے والے تیل اور دیگر اجزاء کی کوالٹی بھی انتہائی ناقص ہے۔ شہریوں کا کہنا ہے کہ یہ ہوٹل مالکان سستے اور ناقص اجزاء خرید کر ان سے تیار شدہ کھانے فروخت کر رہے ہیں، جس سے مختلف بیماریوں جیسا کہ معدے کی بیماریاں، فوڈ پوائزننگ، اور پیٹ کی خرابی عام ہو رہی ہیں۔ ہسپتالوں میں آنے والے مریضوں کی بڑی تعداد انہی مسائل کا شکار ہوتی ہے۔ ڈاکٹروں کے مطابق یہ بیماریاں براہِ راست ناقص کھانے پینے کی وجہ سے ہو رہی ہیں۔شہریوں کا کہنا ہے کہ فوڈ اتھارٹی کی جانب سے اس سلسلے میں خاطر خواہ کاروائی نہیں کی جا رہی۔ فوڈ اتھارٹی کی جانب سے کبھی کبھار چھاپے تو مارے جاتے ہیں، لیکن مستقل نگرانی کا کوئی نظام نظر نہیں آتا۔ بعض مقامات پر فوڈ اتھارٹی کے افسران کی مبینہ ملی بھگت اور رشوت کے واقعات بھی سامنے آئے ہیں جس کی وجہ سے ہوٹل مالکان بلا خوف ناقص کھانے فروخت کر رہے ہیں۔فوڈ اتھارٹی کے ترجمان کا کہنا ہے کہ وہ ہوٹلوں کے خلاف کاروائیوں میں تیزی لا رہے ہیں اور صفائی ستھرائی کے اصولوں کی خلاف ورزی کرنے والوں کے خلاف سخت اقدامات کیے جائیں گے۔ ان کا کہنا تھا کہ شہریوں کی شکایات پر فوڈ اتھارٹی فوری ایکشن لے گی اور قانون کے مطابق ایسے ہوٹلوں کے خلاف بھاری جرمانے عائد کیے جائیں گے۔دوسری جانب، شہریوں نے متعلقہ حکام سے مطالبہ کیا ہے کہ وہ اس مسئلے کا فوری نوٹس لیں اور ناقص کھانے فروخت کرنے والے ہوٹلوں کے خلاف سخت کاروائی کریں تاکہ عوام کو صحت بخش اور معیاری کھانے مل سکیں۔ شہریوں کا کہنا ہے کہ صحت سے متعلقہ اس اہم مسئلے کو فوری طور پر حل کرنا وقت کی ضرورت ہے تاکہ بیماریاں پھیلنے سے روکی جا سکیں اور لوگوں کو صاف ستھری خوراک فراہم کی جا سکے۔