زائرین کو بہتر ین سہولیات کی فراہمی یقینی بنائی گئی ہے‘شافع حسین

لاہور (آئی این پی)صوبائی وزیر اوقاف ومذہبی امور چوہدری شافع حسین نے کہاہے کہ حضرت داتا گنج بخش رحمة اللہ علیہ کا آستانہ سب سے بڑا روحانی مرکز ہے جہاں دنیا بھر سے عقیدت مند حاضری کی سعادت حاصل کرتے ہیں،حضرت داتا گنج بخش رحمة اللہ علیہ نے قرآن کی تعلیمات کی ترویج کیلئے بھرپور کردار ادا کیا،حضرت داتا گنج بخش رحمة اللہ علیہ کے 982 ویں سالانہ عرس کی تقریبات کل (بدھ ) 13 سے 15 اگست تک لاہورمیں ہوں گی۔ان خیالات کا اظہار صوبائی وزیر اوقاف ومذہبی امور چوہدری شافع حسین نے ڈی جی پی آر آفس میں ایک پریس کانفرنس سے خطاب کرتے ہوئے کیا۔ صوبائی وزیر نے کہاکہ وزیر اعلیٰ پنجاب کی ہدایت پر اس سال حضرت داتا گنج بخش کے عرس کے حوالے سے پہلے سے بڑھ کر انتظامات کئے گئے ہیں اور زائرین کو بہتر ین سہولیات کی فراہمی یقینی بنائی گئی ہے انہوں نے بتایا کہ دربار کی توسیع کا منصوبہ اس سال مکمل ہوگا جس میں نائب وزیر اعظم اسحاق ڈار کا بڑا کردار ہے۔چوہدری شافع حسین نے کہاکہ عرس کے موقع پر سیکیورٹی کے فول پروف انتظامات کئے گئے ہیں۔وزیر اعلیٰ کی ہدایت پر زائرین کو بہتر سے بہتر سہولیات کی فراہمی یقینی بنائی گئی ہے۔ انہوں نے کہا کہ صفائی نصف ایمان ہے اس لئے مساجد اور درباروں میں صفائی کی صورتحال کی بہتری کیلئے سیکرٹری اوقاف اور ڈی جی مزہبی امور کو خصوصی ہدایات جاری کی گئی ہیں اس کے علاوہ داتا صاحب کے عرس کے دوران بجلی اور گیس کی مسلسل فراہمی یقینی بنانے کیلئے متعلقہ محکموں سے بات چیت کی گئی ہے۔صوبائی وزیر نے کہا کہ درباروں پر نصب چندے کے باکسز میں کرپشن کی روک تھام کیلئے لائحہ عمل بنایا جارہا ہے،کوشش ہے کہ بڑے درباروں پر پنجاب بنک کی چھوٹی برانچیں قائم کی جائیں۔صوبائی وزیر اوقاف نے کہاکہ نگران حکومت سے قبل کے دور حکومت میں اوقاف کی 80فیصد زمینوں پر ناجائز قبضے ہوئے،اوقاف کی زمینوں پر ناجائز قبضوں کے خاتمے کیلئے ایکشن پلان بنا لیا ہے اس مقصد کیلئے اعلیٰ اختیاراتی کمیٹی کام کر رہی ہے۔اوقاف کی بنجر زمینوں کو استعمال میں لانے پر بھی کام شروع کردیا ہے۔ صوبائی وزیر نے کہا کہ درباروں اور مساجد کی تزئین آرائش کے لئے رواں مالی سال کے بجٹ میں 3 ارب روپے رکھے گئے ہیں۔بڑھتی ہوئی آبادی کی ضروریات کے پیش نظر نئی مساجد بھی بنائی جائیں گی۔محکمہ اوقاف کی مکمل ڈیجیٹائزیشن کی جارہی ہے۔ چوہدری شافع حسین نے کہاکہ مجھے 4 ماہ قبل محکمہ اوقاف ومذہبی امور کا اضافی چارج ملا ہے ادارے کے امور کی بہتری کیلئے ٹھوس اقدامات کئے ہیں۔ انہوں نے کہا کہ اسلام امن اور سلامتی والا مذہب ہے جس میں دہشت گردی کی کوئی گنجائش نہیں،ہمیں مل کر وطن عزیز کو امن اور سلامتی کا گہوارہ بنانا ہے۔ صوبائی وزیر نے ایک سوال کے جواب میں کہا کہ ہمیں 14 اگست 1947کوحقیقی آزادی مل گئی تھی اب ملک کی ترقی کیلئے سب کو مل کر محنت کرنا ہے۔ صوبائی وزیراوقاف چوہدری شافع حسین نے کہاکہ ایک جماعت کے پی کے میں کئی سالوں سے برس اقتدار ہے لیکن وہاں ایک بھی جنرل ہسپتال نہیں بناسکی۔پنجاب کی میٹرو بس کو مہنگا منصوبہ کہنے والوں نے اپنے صوبے میں اس منصوبے پر پنجاب سے کہیں زیادہ وسائل خرچ کردئیے۔سیاست دانوں کو ایسی بات نہیں کرنی چاہیے جس پر عمل نہ کرسکیں۔صوبائی سیکرٹری اوقاف ڈاکٹر طاہر رضا بخآری نے کہاکہ حضرت داتا گنج بخش رحمة اللہ علیہ کی تصنیفِ کشف المحجوب کے ہزار سال مکمل ہونے پر دنیا بھر میں سیمینار ہورہے ہیں،کشف المحجوب کی ہزار سالہ تقریبات کے حوالے سے حکومت کی جانب سے سپیشل گرانٹ کی فراہمی پر مشکور ہیں۔ ڈاکٹر طاہر رضا بخآری نے کہاکہ محکمہ اوقاف کی گزشتہ تین سال کے دوران ریکارڈ آمدن ہوئی ہے۔ڈی جی مذہبی امور،ایڈمنسٹریٹر داتا دربار اور محکمہ اوقاف کے دیگر افسران بھی پریس کانفرنس میں موجود تھے۔