گوجرانوالہ (نامہ نگار)انٹرنیشنل انسٹیٹیوٹ آف سائنس، آرٹس اینڈ ٹیکنالوجی (آئی سیٹ) یونیورسٹی گوجرانوالہ کے سالانہ اسپورٹس و کلچرل گالا “فیئسٹا 2026” کی اختتامی تقریب جوش و خروش اور رنگا رنگ سرگرمیوں کے ساتھ منعقد ہوئی، جس میں اسپورٹس مین اسپرٹ، ٹیم ورک اور نوجوانوں کو بااختیار بنانے کے جذبے کو بھرپور انداز میں اجاگر کیا گیا۔
اختتامی تقریب میں معزز مہمانوں میں ڈپٹی کمشنر گوجرانوالہ نوید احمد، چانسلر آئی سیٹ یونیورسٹی فیصل منظور، وائس چانسلر پروفیسر ڈاکٹر زرین فاطمہ رضوی، ڈائریکٹر سونیکس غلام دستگیر، بانی و چیئرمین الشفاء فیوچر ہسپتال ڈاکٹر سرفراز مغل اور ڈاکٹر رانا بابر سہیل شامل تھے۔ معزز مہمانوں نے اسپورٹس گالا کے کامیاب انعقاد کو سراہا اور تعلیمی اداروں میں جسمانی سرگرمیوں کی اہمیت پر زور دیا۔
شرکاء سے خطاب کرتے ہوئے ڈپٹی کمشنر نوید احمد نے کہا کہ کھیل طلبہ میں کردار سازی، نظم و ضبط اور قائدانہ صلاحیتوں کے فروغ میں اہم کردار ادا کرتے ہیں۔ چانسلر فیصل منظور نے طلبہ کی بھرپور اور پرجوش شرکت پر فخر کا اظہار کیا اور اس عزم کا اعادہ کیا کہ آئی سیٹ یونیورسٹی ایک متوازن تعلیمی ماحول کے فروغ کے لیے کوشاں ہے جہاں تعلیمی برتری کے ساتھ جسمانی فٹنس کو بھی اہمیت دی جاتی ہے۔
چانسلر فیصل منظور اور وائس چانسلر پروفیسر ڈاکٹر زرین فاطمہ رضوی نے اس منظم اور رنگا رنگ تقریب کے انعقاد پر منتظمین اور طلبہ کو مبارکباد دی اور کہا کہ کھیلوں کی سرگرمیاں نوجوانوں میں خود اعتمادی، ٹیم ورک اور صحت مند طرزِ زندگی کو فروغ دیتی ہیں۔ دیگر مقررین جن میں غلام دستگیر اور ڈاکٹر سرفراز مغل شامل تھے، نے بھی کھیلوں کے ذہنی اور جسمانی صحت پر مثبت اثرات پر اظہارِ خیال کیا۔
تقریب کے اختتام پر معزز مہمانوں نے نمایاں کارکردگی دکھانے والے کھلاڑیوں اور منتظمین میں ٹرافیاں، تمغے اور اسناد تقسیم کیں۔ تقریب کا اختتام تالیوں، گروپ فوٹو سیشن اور مستقبل میں بھی ایسی صحت مند روایات کو جاری رکھنے کے عزم کے ساتھ ہوا۔
سالانہ اسپورٹس و کلچرل گالا “فیئسٹا 2026” اتحاد، جذبے، حوصلہ افزائی اور کھیلوں و ثقافتی سرگرمیوں کے فروغ کا ایک یادگار مظہر ثابت ہوا
