کشمیریوں کو حق خودارادیت ملنے تک چین سے نہیں بیٹھیں گے‘ملک افضل کھوکھر

لاہور(آئی این پی)مسلم لیگ (ن) کے مرکزی رہنما و رکن قومی اسمبلی ملک افضل کھوکھر نے کہا ہے کہ کشمیریوں کو حق خودارادیت ملنے تک چین سے نہیں بیٹھیں گے،بھارت نے کشمیر کو ہڑپ کرنے کا خواب دیکھا، ہم نے غاصبوں کو مٹی میں دفن کر دیا،ہم نے بھارت کو ایسا منہ توڑ جواب دیا کہ وہ آج بھی دنیا کے سامنے منہ چھپاتا پھر رہا ہے۔انہوںنے اپنے بیان میں کہا کہ بھارت نے آئینی ترامیم کے ذریعے مقبوضہ کشمیر کی خصوصی حیثیت ختم کر دی جو بین الاقوامی قوانین اور اقوامِ متحدہ کی قراردادوں کی صریح خلاف ورزی ہے۔بھارتی وزیر اعظم نریندر مودی نے یہ سوچا تھا کہ وہ آسانی سے کشمیر کو ہڑپ کر لے گا اور چند دنوں کے احتجاج کے بعد دنیا سب کچھ بھلا دے گی لیکن ایسا نہیں ہوا، کشمیری عوام آج بھی اپنے حقِ خودارادیت کے لیے پرعزم ہیں۔ملک افضل کھوکھر نے کہا کہ مودی یاد رکھے کہ ہم نے ماضی میں بھی غاصبوں کو مٹی میں دفن کیا ہے، بھارت نے پاکستان پر حملہ کیا اور ہمیں دبانے کی کوشش کی مگر ہم نے ایسا منہ توڑ جواب دیا کہ وہ آج بھی دنیا کے سامنے منہ چھپاتا پھر رہا ہے۔انہوں نے کشمیری عوام کی قربانیوں کو خراج تحسین پیش کیا اور کہا کہ پاکستان ہر سطح پر کشمیریوں کی سیاسی، سفارتی اور اخلاقی حمایت جاری رکھے گا۔