لاہور :نیو ایئر نائٹ، پنجاب پولیس کا سکیورٹی پلان مکمل

لاہور( نامہ نگار )انسپکٹر جنرل پولیس پنجاب ڈاکٹر عثمان انور کی ہدایت پر پنجاب پولیس نے نیو ایئر نائٹ کے موقع پر امن و امان یقینی بنانے کے لئے جامع سکیورٹی پلان مکمل کر لیا ہے۔ آئی جی پنجاب نے لاہور سمیت صوبہ بھر میں سکیورٹی بڑھانے کے احکامات جاری کیے ہیں۔ترجمان پنجاب پولیس نے بتایا کہ نیو ایئر نائٹ پر صوبہ بھر میں 419 انسپکٹرز، 1267 سب انسپکٹرز، 2189 اے ایس آئیز، 1408 ہیڈ کانسٹیبلز اور 16977 کانسٹیبلز و دیگر اہلکار سکیورٹی ڈیوٹی سر انجام دیں گے۔ جبکہ لاہور میں 05 ہزار سے زائد افسران و اہلکار سکیورٹی پر مامور ہوں گے۔ لاہور سمیت صوبہ بھر میں سی سی ٹی وی کیمروں اور سیف سٹی سسٹم کی مدد سے تمام سرگرمیوں کی مانیٹرنگ کی جائے گی۔ آئی جی پنجاب ڈاکٹر عثمان انور نے پولیس کو ہائی الرٹ رہنے اور ملک دشمن عناصر پر کڑی نظر رکھنے کی ہدایت کی ہے۔آئی جی پنجاب نے واضح کیا کہ نیو ایئر نائٹ پر ون ویلنگ، ہوائی فائرنگ، اسلحہ کی نمائش اور ہلڑ بازی کی ہرگز اجازت نہیں ہو گی۔ خواتین اور شہریوں کو ہراساں کرنے والے شرپسند عناصر کے خلاف سخت کارروائی کرتے ہوئے انہیں حوالات بند کیا جائے گا۔ڈاکٹر عثمان انور نے نیو ایئر نائٹ پر ٹریفک کے مربوط انتظامات یقینی بنانے کا بھی حکم دیا۔ انہوں نے کہا کہ ڈولفن سکواڈ، پیرو، ایلیٹ فورس اور پی ایچ پی ٹیمیں سڑکوں اور شاہراہوں پر پٹرولنگ مزید بڑھائیں۔آئی جی پنجاب نے مزید ہدایت کی کہ لاہور سمیت تمام شہروں میں سرچ اینڈ سویپ آپریشنز باقاعدگی سے جاری رکھے جائیں جبکہ گزشتہ سال کے ریکارڈ یافتہ ون ویلرز اور ہوائی فائرنگ کے ملزمان سے ضمانتی مچلکے حاصل کیے جائیں۔ڈاکٹر عثمان انور نے کہا کہ سی سی پی او لاہور، آر پی اوز اور ڈی پی اوز امن و امان کی صورتحال برقرار رکھنے کیلئے تمام انتظامات کی خود نگرانی کریں۔ سی ٹی او لاہور سمیت تمام ڈسٹرکٹ ٹریفک افسران ٹریفک کی روانی برقرار رکھنے کیلئے اضافی نفری تعینات کریں۔آئی جی پنجاب نے شہریوں سے اپیل کی کہ ون ویلنگ، اسلحہ کی نمائش اور ہوائی فائرنگ میں ملوث عناصر کی اطلاع 15 پر دیں۔