پولیس ملازمین کی شکایات / اردل روم کا انعقاد

اسلام آباد (کرائمز پوائنٹ ڈاٹ کام ) اسلام آباد کیپیٹل ٹیریٹری (آئی سی ٹی) پولیس کے ڈپٹی انسپکٹر جنرل (ڈی آئی جی) سیکیورٹی محمد عتیق طاہر نے پولیس حکام کو درپیش محکمانہ اور ذاتی مسائل کے بروقت اور ترجیحی حل کو یقینی بنانے کے لیے اپنے دفتر میں اردل روم کا انعقاد کیا۔ایک پولیس اہلکار نے اتوار کو ’’نمائندہ کرائمز پوائنٹ ‘‘کو بتایا کہ سکیورٹی ڈویژن کے افسران نے اردل روم میں شرکت کی جس کے دوران انہوں نے اپنی سرکاری اور ذاتی شکایات براہ راست ڈی آئی جی سکیورٹی کو پیش کیں۔اہلکار نے بتایا کہ ڈی آئی جی سکیورٹی محمد عتیق طاہر نے متعلقہ افسران کو ہدایت کی کہ تازہ معاملات کی انکوائری کریں ۔ انہوں نے دیگر زیر التوا مسائل کو ترجیحی بنیادوں پر فوری حل کرنے کی ہدایات بھی جاری کیں۔اس موقع پر ڈی آئی جی سکیورٹی نے کہا کہ پولیس ملازمین کی فلاح و بہبود کے لیے پہلے ہی متعدد اقدامات کیے جا چکے ہیں جن میں رہائش کی سہولیات، بہتر طبی خدمات اور ان کے اہل خانہ کے لیے تعلیمی معیار کو بڑھانے کے اقدامات شامل ہیں۔اردل روم کے شرکاء سے خطاب کرتے ہوئے انہوں نے کہا کہ کسی بھی قسم کی پریشانی کا سامنا کرنے والے ملازمین کے لیے میرے دفتر کے دروازے کھلے ہیں۔ انہوں نے مزید کہا کہ شہر کی بہتری کے لیے اجتماعی کوششیں ضروری ہیں۔انہوں نے اس بات پر زور دیا کہ اردل روم کے انعقاد کا مقصد پولیس ملازمین کی فلاح و بہبود، ذاتی اور سرکاری معاملات کا بروقت حل اور پولیس فورس میں کام کرنے کے لیے معاون ماحول کو یقینی بنانا ہے۔