مریم نواز شریف سے ڈپٹی سپیکر پنجاب اسمبلی ملک ظہیر اقبال چنڑ کی ملاقات

لاہور(آئی این پی)وزیراعلیٰ مریم نواز شریف سے ڈپٹی سپیکر پنجاب اسمبلی ملک ظہیر اقبال چنڑنے ملاقات کی۔ ملاقات میں عمومی سیاسی صورتحال اور جنوبی پنجاب میں جاری ترقیاتی منصوبوں پر تفصیلی تبادلہ خیال کیا گیا۔ ڈپٹی سپیکر پنجاب اسمبلی ملک ظہیر اقبال چنڑ نے صوبے میں روڈز کی تعمیر و بحالی پر خراج تحسین پیش کیا۔ ڈپٹی سپیکر ملک ظہیر اقبال چنڑ نے بہاولپور میں برن سنٹر بنانے پر وزیراعلیٰ مریم نواز شریف کا شکریہ بھی ادا کیا۔ ملک ظہیر اقبال چنڑ نے پنجاب بھر میں فیلڈ ہسپتال، کلینک آن ویل، مریم نواز ہیلتھ کلینک پراجیکٹ کو سراہا اور پنجاب ڈویلپمنٹ پروگرام کے تحت ہر شہر کی یکساں ترقی کے ویڑن کو گیم چینجر قرار دیا۔ ڈپٹی سپیکر پنجاب اسمبلی نے ائیر ایمبولنس،فیلڈ ہسپتال اور تجاوزات کے خاتمے کیلئے اقدامات پربھی وزیراعلیٰ مریم نواز شریف کو خراج تحسین پیش کیا۔ اس موقع پر عوام کی ضروریات کے پیش نظر بہاولپور میں چلڈرن ہسپتال کے قیام کی اصولی منظوری دی گئی۔ ملاقات میں بہاولپور کے سول ہسپتال کے قریب چلڈرن ہسپتال کی تعمیر پر اتفاق کیا گیا۔ وزیراعلیٰ مریم نواز شریف نے بہاولپور چلڈرن ہسپتال پراجیکٹ کا پلان طلب کر لیا۔ وزیراعلیٰ مریم نواز شریف نے گفتگو کرتے ہوئے کہا کہ پنجاب کی ترقی کے منصوبے میرے دل کے بے حد قریب ہیں۔جنوبی پنجاب کے عوام کو بنیادی سہولتیں دہلیز پر فراہم کر رہے ہیں۔ڈپٹی سپیکر پنجاب اسمبلی ملک ظہیر اقبال چنڑ نے کہا کہ وزیراعلیٰ مریم نواز شریف کی قیادت میں پنجاب حقیقی ترقی کی راہ پر گامزن ہے۔عوام دوست فیصلے مریم نواز شریف کی حکومت کا طرہ امتیاز ہیں۔