متحدہ عرب امارات سے 5مطلوب اشتہاری گرفتاری کے بعد پاکستان منتقل

لاہور ( آئی این پی) کرائم کنٹرول ڈیپارٹمنٹ کی جانب سے بیرون ملک فرار اشتہاریوں کے خلاف آپریشن جاری ہے ،سپیشل آپریشن سیل نے متحد عرب امارات سے پانچ مطلوب اشتہاریوں کو گرفتار کر لیا۔ ترجمان کے مطابق گرفتار ملزمان سی سی ڈی کو قتل اور مالی فراڈ کے مختلف مقدمات میں مطلوب تھے، سی سی ڈی ٹیم پانچوں اشتہاریوں کو لے کر یو اے ای سے پاکستان پہنچی۔ گرفتار ملزمان میں قتل کے مقدمہ میں سیالکوٹ پولیس کو مطلوب اشتہاری محمد جمیل شامل ہے ، نارووال پولیس کو قتل کے مقدمے میں مطلوب گل باز خان کو بھی گرفتار کر لیا گیا ہے ، فیصل آباد پولیس کو قتل کے مقدمے میں مطلوب ملزم محمد الیاس کو بھی گرفتار کیا گیا ہے ۔ گرفتار اشتہاری نوید ڈار لاہور پولیس کو مالی فراڈ کے مقدمہ میں مطلوب تھا، فیصل آباد پولیس کو مالی فراڈ کے مقدمے میں مطلوب شہزام خورشید کو بھی یو اے ای سے گرفتار کیا گیا ہے۔ ترجمان نے کہا کہ بیرون ملک بیٹھ کر پاکستان میں جرائم کرنے یا کروانے کی ہرگز اجازت نہیں دی جا سکتی ، پاکستان میں جرائم کر کے بیرون ملک فرار اشتہاریوں کو ہر قیمت پر گرفتار کر کے پاکستان لایا جائے گا۔قانون سے کوئی بالاتر نہیں ، بیرون ملک فرار اشتہاریوں کے ساتھ آہنی ہاتھوں سے نمٹا جائیگا۔