ہائیکورٹ کا مغویہ بہن کی بازیابی سے متعلق درخواست پر آر پی او گجرات کو ریکارڈ سمیت پیش ہونے کا حکم

لاہور(آئی این پی) لاہور ہائیکورٹ نے مغویہ بہن کی بازیابی سے متعلق درخواست میں آر پی او گجرات کو ریکارڈ سمیت پیش ہونے کا حکم دے دیا۔چیف جسٹس مس عالیہ نیلم نے کیس کی سماعت کے دوران سرکاری وکیل کی جانب سے پیش کی گئی رپورٹ کو مسترد کر دیا اور پولیس کی تفتیش پر عدم اطمینان کا اظہار کیا۔سرکاری وکیل نے موقف اپنایا کہ پولیس مغویہ کو تلاش کر رہی ہے اور درخواست گزار سے بھی تعاون کی درخواست کی گئی ہے۔دوران سماعت سرکاری وکیل نے کہا کہ اگر خاتون گھر پر نہ ہو تو یہ قیامت کا منظر ہوتا ہے، پولیس سنجیدگی سے معاملے کی تفتیش کر رہی ہے، چیف جسٹس نے مقدمے کی تفتیش تبدیل کرنے کا بھی عندیہ دیا ہے تاکہ شفاف تحقیقات ممکن ہو سکیں۔درخواست گزار محمد ارشد نے موقف اپنایا کہ اس کی ہمشیرہ دیبا کو سی سی ڈی پولیس نے غیرقانونی طور پر اٹھا لیا ہے اور ان کی بازیابی کیلئے عدالت سے رجوع کیا ہے، انہوں نے عدالت سے استدعا کی کہ دیبا کی فوری بازیابی کا حکم دیا جائے۔عدالت نے معاملے کی حساسیت کو دیکھتے ہوئے متعلقہ افسران کو آئندہ سماعت پر ریکارڈ سمیت حاضر ہونے کی ہدایت کر دی، عدالت نے کیس کی مزید سماعت 30جولائی تک ملتوی کر دی۔