پاکستان کی تاریخ کا پہلا ٹنل بورنگ سیوریج منصوبہ حتمی طور پر منظور کر لیا گیا

لاہور (آئی این پی)شہریوں کی روزمرہ زندگی میں خلل ڈالے بغیر، زیر زمین سیوریج کی تنصیب، لاہور شہر میں پاکستان کی تاریخ کا پہلا ٹنل بورنگ سیوریج منصوبہ حتمی طور پر منظور کر لیا گیا ۔ ایگزیکٹو کمیٹی آف نیشنل اکنامک کونسل )ایکنک (نے منصوبے کی منظوری دے دی ہے ۔ایکنک کونسل کی صدارت ڈپٹی وزیر اعظم اسحاق ڈار نے کی جبکہ چیئرمین پی اینڈ ڈی ، سیکرٹری ہاﺅسنگ اور ایم ڈی واسا نے زوم پر اجلاس میں شرکت کی ۔ لاریکس کالونی سے گلشن راوی تک 32کلومیٹر سے زائد سیوریج لائن کی تنصیب کی جائے گی ۔ منصوبے سے وسطی لاہور کے گنجان آباد علاقوں کے نکاسی آب کے نظام کا دیر پا حل ممکن ہو سکے گا ۔منصوبے کی تکمیل سے تقریباً 25لاکھ کی آبادی براہ راست مستفید ہوسکے گی ۔ ٹنل بورنگ منصوبہ لاہور کے سیوریج نظام کے لیے ایک گیم چینجر ثابت ہوگا۔ پائپ کی تیاری جدید ورٹیکل سپننگ مشین سے کی جائے گی ۔ ورٹیکل سپننگ ٹیکنالوجی سے پائپ کی عمر تقریباً 100 سال سے زائد ہو جاتی ہے۔وسائل کی بچت کے لیے منصوبے کی تکمیل کے بعد شہر میں قائم 22سے زائد لفٹ اسٹیشنز کو بند کر دیا جائے گا ۔ منصوبے کی پلاننگ اور ڈیزائن معروف امریکی کنسلٹنٹ ای بی اے انجینئرنگ نے کی ہے ۔منصوبے کا باقاعدہ آغاز ہونے کے بعد تکمیل جون 2028ے تک ہوگی ۔ ٹنل بورنگ سے سیوریج نظام کو بابو صابو ویسٹ واٹر ٹریٹمنٹ پلانٹ سے منسلک کیا جائے گا۔ترجمان محکمہ ہاﺅسنگ نے کہا کہ یہ منصوبہ وزیراعلی پنجاب مریم نواز شریف کی ذاتی دلچسپی، ویژن اور قیادت کا منہ بولتا ثبوت ہے، پنجاب حکومت کا ٹنل بورنگ منصوبہ شہری سہولیات میں بہتری کے لیے جاری جدوجہد کا مظہر ہے، یہ منصوبہ لاہور کے لاکھوں شہریوں کے لیے بہتر، جدید اور باوقار زندگی کی جانب اہم قدم ہے۔