لاہور میں”رنگِ پاکستان“چار روزہ نمائش کا آغاز

لاہور (آئی این پی)یومِ آزادی کی مناسبت سے گورنمنٹ کالج یونیورسٹی لاہور میں”رنگِ پاکستان“نمائش کا آغاز پیر کے روز ہوا جس کا افتتاح چیف سیکریٹری پنجاب زاہد اختر زمان نے کیا۔ وائس چانسلر جی سی یو لاہور پروفیسر ڈاکٹر محمد عمر چوہدری ، وائس چانسلر جی سی یو فیصل آبادپروفیسر ڈاکٹر ر¶ف اعظم نے افتتاحی تقریب میں شرکت کی۔چار روزہ نمائش کا مقصد پاکستان کے ثقافتی ورثے کو اجاگر کرنا ہے۔ نمائش میں اساتذہ اور طلبہ کے تیار کردہ فن پارے شامل ہیں، جن میں پاکستان کی ثقافت، لاہور کی خوبصورتی، علاقائی حسن اور موجودہ چیلنجز کو نمایاں کیا گیا ہے۔چیف سیکریٹری نے طلبہ کی پینٹنگز، فوٹوگرافی اور ماحولیاتی چیلنجز پر مبنی فن پاروں میں گہری دلچسپی کا اظہار کیا۔ اس موقع پر گفتگو کرتے ہوئے انکا کہنا تھا کہ اس سال جشنِ آزادی معرکہ حق کی فتح کے جذبے کے ساتھ منایا جا رہا ہے۔ انہوں نے کہا کہ یومِ آزادی کو مثالی انداز میں منانے کا مقصد حصولِ آزادی کی جدوجہد اور تحفظِ آزادی کی اہمیت کو اجاگر کرنا ہے۔وائس چانسلر پروفیسر محمد عمر چوہدری نے کہا کہ نوجوان فنکار سماجی طور پر باشعور آواز کے طور پر اُبھر رہے ہیں، ان کی ملک و ثقافت سے محبت مثالی ہے۔ وائس چانسلر پروفیسر محمد عمر چوہدری نے چیف سیکریٹری پنجاب کو پینٹنگ بطور سووینیئر بھی پیش کی۔نمائش کا انعقاد جی سی یو فیصل آباد اور انٹر یونیورسٹی کنسورشیم کے اشتراک سے کیا گیا ہے۔نمائش 11 اگست سے 14 اگست تک جی سی یو کے سلام ہال میں جاری رہے گی۔ اس موقع پر جی سی یو کے ڈین پروفیسر بابر عزیز اور کوآرڈینیٹر انٹر یونیورسٹی کنسورشیم مرتضیٰ نور بھی موجود تھے۔