11فوڈ فیکٹریوں اور یونٹس کی چیکنگ، لاکھوں کے جرمانے

لاہور( آئی این پی) پنجاب فوڈ اتھارٹی کی جانب سے لاہور اور مضافات میں بڑا کریک ڈاﺅن کرتے ہوئے 50ہزار لیٹر ایکسپائر تیل،14ہزار کلو خام مال، 900کلو پاﺅڈر، 250ایکسپائر گم اور ممنوعہ اشیاءتلف کر دی گئیں ۔ ڈی جی فوڈ اتھارٹی عاصم جاوید کی ٹیموں کے ہمراہ ملتان روڈ، شیخوپورہ روڈ پر کارروائیاں کی گئیں ۔ 11فوڈ فیکٹریوں اور یونٹس کی چیکنگ،معروف بسکٹ فیکٹری اور سٹور بند، 5یونٹس کو 7لاکھ 65ہزار کے جرمانے عائد کیے گئے ۔ ڈی جی فوڈ اتھارٹی عاصم جاوید نے بتایا کہ قوانین کی خلاف ورزی پر شیخوپورہ روڈ پر واقع معروف بسکٹ فیکٹری اور ملتان روڈ پر فوڈ سٹور کو بند کر دیا گیا۔فوڈ سٹوریج کو ایکسپائر 40ہزار لیٹر آئل برآمد ہونے پر بند کیا گیا۔معروف بسکٹ کی تیاری میں ایکسپائر خام مال استعمال کرنے پر فیکٹری کو بند کر دیا گیا۔ ایکسپائر اور فریش سٹاک کے لیے علیحدہ جگہ مختص نہ تھی، اکٹھے رکھے پائے گئے، فیکٹری میں صفائی کے ناقص انتظامات پائے گئے، ورکرز کے میڈیکل اور ٹریننگ سمیت دیگر لازم ریکارڈ عدم موجود پایا گیا، پروسیسنگ ایریا میں بدبودار ماحول اور اشیا کھلی موجود پائی گئی۔عاصم جاوید نے کہا کہ وزیر اعلیٰ پنجاب کے ویژن کے مطابق ملاوٹ مافیا کے خاتمے کے لیے تمام تر وسائل بروئے کار لائے جائیں گے، فوڈ بزنس آپریٹرز مقرر کردہ قوانین پر عملدرآمد یقینی بنائیں، خلاف ورزی پر کوئی رعایت نہیں ہے، شہری خوراک سے متعلق کسی بھی قسم کی شکایات 1223پر درج کروا سکتے ہیں۔