گوجرانوالہ (رانا عبدالغفار خاں )اسلامیہ گریجوایٹ کالج گوجرانوالہ کا گراؤنڈ پرنسپل کی مبینہ سرپرستی میں فٹ بال میچز کی آڑ میں بدامنی کا گڑھ بن گیا ہے۔ حالیہ دنوں میں ایک میچ کے دوران آتشی اسلحے کا آزادانہ استعمال کیا گیا اور ہوائی فائرنگ سے علاقہ مکینوں میں شدید خوف و ہراس پھیل گیا۔ تھانہ باغبان پورہ پولس نے مقدمہ نمبر 25/1365 درج کر لیا گیا۔
تفصیلات کے مطابق کالج انتظامیہ بیرونی افراد سے بھاری رقوم وصول کر کے گراؤنڈ کو کرائے پر دے رہی ہے، جہاں فٹ بال میچز کے نام پر ہنگامہ آرائی، شور شرابہ، اور غیر اخلاقی سرگرمیاں عام ہو چکی ہیں۔ افسوسناک امر یہ ہے کہ گراؤنڈ کے اصل مستحق یعنی علاقے کے بزرگ شہری، مریض، اور بچے، جو صبح یا شام کی سیر کے لیے اس سہولت کے خواہاں ہیں، وہ سرکاری احکامات کے باوجود گراؤنڈ میں داخلے کی اجازت سے محروم ہیں۔
اہلِ علاقہ کا کہنا ہے کہ پرنسپل اکرم ورک کی ہٹ دھرمی اور غیر سنجیدہ رویہ اس تعلیمی ادارے کو ایک کاروباری مرکز میں تبدیل کر رہا ہے، جہاں نہ قانون کی پروا ہے اور نہ ہی عوامی فلاح کی۔ انہوں نے اعلیٰ حکام سے مطالبہ کیا ہے کہ فوری طور پر اس معاملے کی تحقیقات کروائی جائیں، گراؤنڈ کو شوگر۔بلڈ پریشر و دل کی بیماریوں میں مبتلا ہمارے بزرگوں کو فٹ پاتھوں اور دوکانوں کے تھڑوں پر بیٹھنے کی بجائے اسلامیہ کالج گراؤنڈ کا سیر کے لیے مناسب شیڈول جاری کیاجائے، اور اسلحے کے استعمال اور بدامنی پھیلانے والے عناصر کے خلاف سخت قانونی کارروائی کی جائے۔
