خانیوال(ثاقب سہیل )ڈپٹی کمشنر خانیوال ملیحہ رشید نے ضلع بھر میں تعمیراتی سرگرمیوں اور سیپٹک ٹینکوں کی غیر قانونی تعمیر کے حوالے سے سخت پابندیاں عائد کرتے ہوئے دفعہ 144 نافذ کر دی ہے۔ یہ حکم نامہ عوامی صحت کے تحفظ، زیر زمین پانی کو آلودگی سے بچانے اور تعمیراتی حادثات کی روک تھام کے لیے جاری کیا گیا ہے۔حکم نامے کے اہم مندرجات:
جاری کردہ نوٹیفکیشن کے مطابق، ضلع خانیوال کی حدود میں کوئی بھی شخص متعلقہ مقامی حکومت کی پیشگی تحریری اجازت کے بغیر 3 فٹ سے زیادہ گہرا گڑھا، کنواں یا سیپٹک ٹینک نہیں کھود سکے گا۔ ڈپٹی کمشنر نے واضح کیا ہے کہ غیر منظم طریقے سے بنائے گئے سیپٹک ٹینک نہ صرف ماحولیاتی آلودگی کا سبب بن رہے ہیں بلکہ گنجان آباد علاقوں میں عمارتوں کی بنیادوں اور عوامی انفراسٹرکچر کے لیے بھی سنگین خطرہ ہیں۔تعمیراتی سائٹس کے لیے نئے ضوابط:نئے حکم نامے کے تحت تعمیراتی یا مسمار کرنے والی جگہوں پر درج ذیل اقدامات کو لازمی قرار دے دیا گیا ہے:
تعمیراتی جگہ کو لوہے کی چادروں سے ڈھانپنا لازمی ہوگا۔
سائٹ پر 24 گھنٹے سیکیورٹی گارڈز کی تعیناتی یقینی بنائی جائے گی۔رات کے وقت حادثات سے بچنے کے لیے روشنی کا مناسب انتظام کرنا ہوگا۔یہ پابندیاں فوری طور پر نافذ العمل ہو چکی ہیں اور 20 مارچ 2026 تک برقرار رہیں گی۔ ڈپٹی کمشنر نے تمام اسسٹنٹ کمشنرز، پولیس افسران اور متعلقہ اداروں کو ہدایت کی ہے کہ ان احکامات کی خلاف ورزی کرنے والوں کے خلاف سخت قانونی کارروائی عمل میں لائی جائے۔
اس حکم نامے کی کاپیاں سیکرٹری ہوم ڈیپارٹمنٹ پنجاب، کمشنر ملتان ڈویژن اور ضلع کے تمام تھانوں کو ضروری کارروائی کے لیے بھجوا دی گئی ہیں۔
