سید نوید حیدرشیرازی کا تعلیمی بورڈ گوجرانوالہ کا اچانک دورہ

گوجرانوالہ 14 جولائی 2025ء(۔ رانا عبدالغفار خاں ) کمشنر گوجرانوالہ ڈویژن/چیئرمین تعلیمی بورڈ گوجرانوالہ سید نوید حیدرشیرازی نے تعلیمی بورڈ گوجرانوالہ کا اچانک دورہ کیا۔ انہوں نے امتحانی نظام اور رزلٹ کی شفاف تیاری کے مراحل بارے برانچ افسران سے خطاب کرتے ہوئے کہا کہ امتحانی نظام میں شفافیت، کارکردگی اور جدید تقاضوں سے ہم آہنگی وقت کی اہم ضرورت ہے۔ انہوں نے ہدایت کی کہ بورڈ کے تمام شعبہ جات اپنی کارکردگی میں بہتری لائیں اور طلباء کو بروقت، منصفانہ اور شفاف سہولیات کی فراہمی کو یقینی بنائیں۔اجلاس میں سیکرٹری بورڈ اور آڈٹ آفیسر بھی شریک تھے، جنہوں نے بورڈ کے انتظامی اور امتحانی نظام بارے بریفنگ دی۔ کمشنرگوجرانوالہ ڈویژن سید نوید حیدر شیرازی نے کہا کہ امتحانی عمل میں مزید بہتری لائی جائے اور ٹیکنالوجی کامؤثر استعمال کر کے طلباء اور والدین کو بہترین سہولت فراہم کی جائیں۔انہوں نے مزید کہا کہ پرچہ سازی، پیپر مارکنگ، اور رزلٹ کی تیاری کے تمام مراحل میں نگرانی کو مزید سخت کیا جائے اور کسی بھی بدعنوانی یا غفلت پر فوری کارروائی کو یقینی بنایا جائے۔کمشنرنے مزید کہا کہ تعلیمی اداروں، طلباء، اساتذہ اور بورڈ کے مابین مربوط روابط قائم کر کے ہی ایک بہتر امتحانی نظام ممکن ہے۔ بورڈ کا عملہ عوام کی جائز توقعات پر پورا اترنے کے لیے ہمہ وقت مستعد رہے۔اجلاس کے اختتام پر کمشنر نے برانچ افسران کو ہدایت کی کہ وہ ہر ممکن کوشش کریں کہ بورڈ کا امتحانی نظام مثالی اور قابل تقلید بنے، غفلت برتنے کی صورت میں محکمانہ کارروائی عمل میں لائی جائے گی۔